भांगरभूंय | प्रतिनिधी
बोडगिणी म्हापश्यांतलो प्रकार, शेतकारांचो आक्षेप
म्हापशें: बोडगेश्वर मैदाना कडली शेत जमीन शेतकारांक विस्वासांत घेनासतना भायले भायर जेसीबीच्या आदारान खणटात. ह्या प्रकाराक शेतकारांनी आक्षेप घेतला आनी एका इव्हेंटाच्या नांवा खाला उक्तेपणान चलपी ह्या बेकायदो खणपाच्या कामा कडेन प्रशासकी यंत्रणेन कशी आडनदर केली असो प्रस्न उप्रासायला.
हे शेत जमनींत खणपाचें काम एका खाजगी इव्हेंटाच्या कार्यावळी खातीर ट्रॅक तयार करपा खातीर करतात असो आरोप श्री बोडगेश्वर शेतकार संघटणेचे अध्यक्ष संजय बर्डे आनी हेरांनी केलो. बुधवारा ह्या कामाची पळोवणी संजय बर्डे, संतोष नायक, समीर साळगांवकार आनी फिलीप डिसोझा हांणी केली.
संजय बर्डेन म्हणलें, शेतकारांक कसलीच कल्पना दिनासतना वा प्रशासकी परवानगी घेनासतना खणपाचें काम करतात. शेत जमनींतली माती व्हड प्रमाणांत काडटात. चवकशे वेळार ह्या खणपाच्या कामाची संबंदितां कडेन कसलीच परवानगी ना.
हांगा मोटारसायकलीचो खाजगी इव्हेंट जावपाचो आसा. ट्रॅक तयार करपा खातीर हें खणपाचें काम करतात. आमचो ह्या इव्हेंटाक आक्षेप ना. पूण शेतांत भायले भायर खणपाचें काम करून माती काडप चुकीचें आसा. ही माती सुपीक आसून हाका लागून शेतजमनीचें लुकसाण केलां. ह्या प्रकाराक थळावें प्रशासन आनी आमदार जापसालदार आशिल्ल्याचो आरोप बर्डेन केलो.
शेतकार संतोष नायक हांणी म्हणलें, शेतकारांचे परवानगे बगर हे खणपाचें काम करतात. अशे तरेन जमनींतली माती खणून व्हेल्यार फुडारांत आमी शेत कशें करप असो प्रस्न तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
