आवाजाचें स्वताचें राज्य

भांगरभूंय | प्रतिनिधी

पूण, गोंय म्हणजे ‘मजा, मजा आनी मजा’ अशें समीकरण जाल्ल्यान चडशे पर्यटक तोच विचार तकलेंत घेवन येतात.

नवें वर्स लागपाक फक्त 1 म्हयनो उरला. सध्या पर्यटकांची भिरीं गोंयांत जळीमळीं भिरभिरतना दिश्टी पडटात. फुडल्या 10-12 दिसांनी गर्दी आनीकूय वाडटली. 31 डिसेंबराक शेनवार आयला. म्हणटकच ते दीस गोंय पर्यटकांनी भरून ओत्तलें. कोरोना काळा उपरांतचें हें पयलें नवें वर्स. गोंयच्या पर्यटन मळाक फाटलीं दोन वर्सां तशीं सुकीं गेलीं. देखून अंदूं केन्ना न्हय तितलो नेट आसतलो. तेन्ना गोंयचेर कसलेंच अरिश्ट येवचें ना. राज्याचें नांव बदनाम जावचें ना, हाची जतनाय सगल्यांकूच घेवची पडटली. ‘अतिथी देवो भव’ आसले तरी कानांत वारें गेल्ल्या पर्यटकांक थातारचें पडटलें. सगल्यांत चड ताण आसतलो तो पुलीस, वरिश्ठ सरकारी अधिकारी आनी पर्यटना कडेन संबंदीत यंत्रणेचेर. कालूच उच्च न्यायालयाच्या गोंय खंडपीठान रातच्या वेळार जावपी आवाजाच्या प्रदुशणा आड सरकारी यंत्रणेक निर्देश दिल्यात. पार्ट्यांनी जावपी आवाज, रातीं 10 उपरांत कायद्यान सांगला ताचे परस वाडचो ना, हाची खबरदारी घेयात, अशें म्हणलां. ताका लागून फुडले काय दीस प्रदूशण नियंत्रण मंडळ, दंडाधिकारी आनी पुलीस खात्याक दोळ्यांत तेल घालून सगले कडेन लक्ष दिवचें पडटलें. आवाजाचें प्रदुशण ही वर्सुकी समस्या आसली तरी ताचेर नियंत्रण हें दवरूंकच जाय. गोंय पर्यटन केंद्र आशिल्ल्यान नेमात सदळसाण दितात, पूण नागरिकांक त्रास, मनस्ताप जाता इतलो बोवाळ करप चुकीचें. कारण आवाज तांचे भलायकेचेर थेट परिणाम करता.
दरवर्सा व्हडल्या आवाजा आड साबार लोक आवाज काडटात. मात तांचो बारीक आवाज ह्या पार्ट्यांच्या आवाजांत विरगळून वता. तो कोणाच्याच कानार पडना…. आनी पडलो तरी कान (हांगां जाय तांणी ‘बोल्स’ हें उतरुय वापरल्यार उपकारता) ओले जाल्ल्यान सरकारी यंत्रणेचे कांय घटक तो आयकूंक नाशिल्ले भशेन करतात. म्हणटकच ते कारवाय करपाचो प्रस्नूच येना. अंदूं तरी न्यायालयाच्या निर्देशाचें पालन जातलें, असो हयकारात्मक विचार करुया. गोंयांत पर्यटन मळाचेर कोट्यांनी रुपयांची उलाढाल जाता. सोरो, ड्रग्स…. आनीक बरेचशें मुक्तपणान व्हांवता. अर्थांत कुटुंबीक बरे पर्यटकूय ह्या दिसांनी पळोवंक मेळटा. पूण, गोंय म्हणजे ‘मजा, मजा आनी मजा’ अशें समीकरण जाल्ल्यान चडशे पर्यटक तोच विचार तकलेंत घेवन येतात. तसो चंगळवाद कोणाक आवडना? सामको सभ्य, संस्कारी मनीस आसलो तरी ताकाय जरा हटके करीन दिसताच. तो तें सोभेमाजार करीना इतलेंच. रातभर खावन, पिवन, मजा केली म्हणून कोण कांय म्हणचो ना. पूण, ताचो लोकांक त्रास जालो काय कायदो बडी मारतलोच! तेन्ना ‘जिवाचो गोवा’ करूंक आयिल्ल्यांनी आनी तांची सरबराय करप्यांनी कायदो पाळचो. न्यायालयान संगीत बंद करात, अशें म्हणूंक ना. तांणी आवाजाची पातळी कायद्यान सांगल्या तितली दवरची, अशें म्हणलां. सरकारी यंत्रणेच्या हातार गुलाबी नोटी दवरल्यो काय आमकां जाय तें करपाक मेळटा वा हाचे पयलीं आमी तें केलां, ह्या भ्रमांत कोणे रावचें न्हय. ड्रग्स विकपी सगले भायले असो बोमाडो फाटलीं बरींच वर्सां उडटालो. तो दोरयेक बांदून आमी सगल्याक भोंवताले. सोनाली फोगाटाच्या मरणान तो पीन लावन फोडलो. हैदराबाद पुलिसांनी उपरांत दोग- तिगांक अटक केली. अजून आनीक ‘गर्नाल’ फुटूं येतात.
मुंबय एक वर्स वायरलेस इयरफोन वापरून दांडिया केल्लो. म्हणल्यार सगल्यांच्या इयरफोनाचेर एकूच पद वाजतालें. भायल्या लोकांक ताचो त्रास ना. तशें कितें गोंयांत करपाक मेळटा जाल्यार पळोवचें. तंत्रज्ञान कितेंय करपाक शकता, इतलें मुखार पावलां. पार्टेचो आवाज 10- 12 किलोमिटर आयकूंक येवपाकूच जाय अशें ना. पार्टी रातचीच कित्याक करची? सांजवेळाय ती करूं येता. 10 पयलीं आटपू येता. तरीय आवाजाची मर्यादा ही पाळपाकूच जाय. सांस्कृतीक, धर्मीक कार्यावळी, विधींक लावडस्पीकराचो आवाज जाता, तोय उणो करूंक जाय. दर्यादेगांचेर जावपी आवाजा आड कागाळ करपाक 50- 60 पुलिसांचे फोन नंबर आशिल्ली जायरात फाटीं दिसाळ्यांनी आयिल्ली. पूण, कागाळ करपा इतलें धाडस कोणाक ना. जाय कित्याक त्यो भानगडी, म्हणीत सगलेच आवाजाचो त्रास सोंसतले. तेन्ना, सरकारी यंत्रणाकूच कितें तें करचें पडटलें. न्यायालयान पावल उखल्लांच, आतां हेर यंत्रणांनीय ‘हम भी कुछ कम नहीं’, हें दाखोवन
दिवचें.