भांगरभूंय | प्रतिनिधी
सोद घेतिल्ल्या 50 मदीं 15 पाणथळ वाठार जाले अधिसुचीत
पणजी : गोंय पाणथळ वाठार प्राधिकरण बेगिनूच राज्यांतले आनीक 6 पाणथळ वाठार अधिसुचीत करपाचे आसा. आतां मेरेन 50 मदीं 15 पाणथळ वाठार अधिसुचीत जाल्या. 19 पाणथळ वाठारांचे मसुदे तयार आसात. तशेंच 10 पाणथळ वाठारांचे मसुदे तयार जावपाचे आसात.
गोंय पाणथळ वाठार प्राधिकरण तशेंच गोंय जैवविविधताय मंडळान राष्ट्रीय हरीत लवादा मुखार ही म्हायती सादर केल्या. काशिनाथ शेट्ये हांचें जनहीत याचिकेच्या सुनावणी वेळार ही म्हायती सादर केली.
राज्यांतली सगल्यो तळयो, झरे तशेंच उदकाचे स्रोत हे पाणथळ वाठार म्हूण जाहीर करपाचे आदेश पाणथळ नेमन प्राधिकरणाक दिवचें, अशी मागणी याचिकादार काशिनाथ शेट्ये हांणी याचिकेंत केल्या. हे याचिकेचेर सुनावणी जाली. फुडली सुनावणी 5 सप्टेंबराक जातली. प्रदुशण नियंत्रण मंडळ, जैवविविधताय मंडळ, केंद्रीय रानां आनी पर्यावरण मंत्रालय हे याचिकेंत प्रतिवादी आसा.
जैवविविधताय मंडळ तशेंच गोंय पाणथळ वाठार प्राधिकरणान पाणथळ वाठार अधिसुचीत करपाची प्रक्रिया सुरू केल्या. आतां मेरेन 50 पाणथळ वाठारांचो सोद लागला. 15 पाणथळ वाठार अधिसुचीत जाल्या. हेर वाठार अधिसुचीत करपाची प्रक्रिया सुरू आसा, अशें पाणथळ वाठार प्राधिकरणान स्पश्ट केलां. पाणथळ वाठार प्राधिकरणान तंत्रीक समिती तशेंच कागाळ समिती स्थापन केल्या.
राज्यांत 5 हेक्टर परस चड जागो आशिल्ले 385 पाणथळ वाठार आसा. तशेंच 2.25 हेक्टर परस उणो जागो आशिल्ल्यो 167 पाणथळ वाठार आसा. 213.77 चौखण किमी जागो आशिल्ले वट्ट 550 पाणथळ वाठार आसात, अशें गोंय राज्य पाणथळ प्राधिकरणान 2019 वर्सा स्पश्ट केल्ले. 30 जुलय 2019 हे दिसा पाणथळ वाठार प्राधिकरणान राष्ट्रीय हरीत लवादा मुखार प्रतिज्ञापत्र सादर केल्ले. तातूंत ही म्हायती आशिल्ली. हे प्रतिज्ञापत्रा प्रमाण पाणथळ वाठार अधिसुचीत जावचे, अशी याचिकेंत मागणी आसा. हें प्रतिज्ञापत्र पोरणें आसा. हाचे उपरांत नवी म्हायती आशिल्लें प्रतिज्ञापत्र पाणथळ वाठार प्राधिकरणान सादर केलां, अशें हरीत लवादान आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
