सरकारान राजभाशा कायद्यांत बदल करचो न्हय

भांगरभूंय | प्रतिनिधी

मडगांवां जाल्ले बसकेंत प्रतिनिधींची एकामुखान मागणी

मडगांव: मराठी भाशेक कोंकणी प्रमाण राजभाशेचो दर्जो दिवपाचे मागणेक सरकारान भीक घालची न्हय, आनी कसल्याच चेपणा खाला बळी पडून राजभाशा कायद्यांत बदल करचो न्हय अशी कोंकणी संघटणांच्या प्रतिनिधींनी एकमुखान मागणी केल्या.

कोंकणी भाशा मंडळ, विद्यानगर मडगांव हांगा काल 31 मे दिसा जाल्ले बसकेंत कोंकणी भाशेच्या संवर्धन आनी प्रसारा खातीर वावुरपी गोंयांतल्या 37 संघटणांचें प्रतिनिधी हजर आशिल्ले.

अखील भारतीय कोंकणी परिशदेन आयोजीत केल्ले ह सभेच्या अध्यक्षस्थानार परिशदेचे अध्यक्ष फा. मोउजीञु द आतायद हजर आशिल्ले.

कोंकणी शिक्षण, संस्कृती, भाशा, रोजगार आनी हेर मळार आमी कोंकणी कार्यकर्ते म्हूण कसलीं कामां करूंक जाय हाचेर विवीध संघटणांच्या प्रतिनिधिनी आपले विचार मांडले.

ह्या वेळार उलयतना उदय भेंब्रे हांणी हाजीर आशिल्ल्यांक सांगलें की, एखादे भाशेक राजभाशेचो दर्जो दितना निकश लायतात, तो म्हणल्यार ती भाशा त्या राज्यांतले चडांत चड लोक उलयतात काय नात, आनी गोंया पुरतो विचार करीत जाल्यार फक्त कोंकणीचे बाबतींत हो निकश सगल्या वटांनी लागू जाता म्हणून फक्त कोंकणीच गोंयची राजभाशा जाली.

कोंकणी संघटणांच्या प्रतिनिधींचें मत मुख्यमंत्र्यांक कळोवपा खातीर एका शिश्टमंडळान तांची भेट घेवची असोय निर्णय घेतलो.

बसकेचे प्रास्तावीक फा. आतायद हांणी केलें आनी परिशदेचे कार्याध्यक्ष चेतन आचार्य हांणी उपकार मानले.