भांगरभूंय | प्रतिनिधी
मुंबयः ज्येश्ठ पार्श्वगायिका सुमन कल्याणपूर हांकां मुंबयंतल्या तांच्या घरांत आयज मरण आयलें. तांची पिराय 89 वर्सा आशिल्ली. तांचो आवाज लता मंगेशकर हांचे सारकोच आसलो.
28 जानेवारी 1937 दिसा पूर्व बंगालांतल्या भवानीपूर शारांत तांचो जल्म जाल्लो. तांचें मूळ नांव सुमन हेमाडी. ती कोंकणीभाशी. मराठी, हिंदी सयत जायत्या भारतीय भाशांनी तांणी शेंकड्यांनी गितां गायल्यांत. भावपूर्ण आवाजाक लागून ती गाजली.
हिंदी चित्रपटसृश्टींत तांणीं “अजू हून आये बालमा”, “ना ना करते प्यार”, “तुमने पुकारा और हम चले आये”, “आजकल तेरे मेरे प्यार के चर्चे”, जिंदगी इम्तिहान लेती है, ये समा…. सारकीं गाजिल्लीं गितां गायलीं. मराठींत “अरे संसार संसार”, “निंबोणीच्या झाडामागे”, “रिमझिम झरती श्रावणधारा, ओमकार प्रधान रुप गणेशाचे, केतकीच्या बनी तिथे नाचला गं मोर, सांग कधी कळणार तुला” हीं तांचीं गितां आयज लेगीत रसिकांच्या ओठांचेर आसात. भावगीत, भक्तीगीत आनी चित्रपटसंगीत ह्या सगल्या मळांचेर तांणी आपली स्वतंत्र छाप उमटयली.
केंद्र सरकारान 2023 वर्सा तांकां ‘पद्मभूषण’ पुरस्कारान सन्मानीत केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
