भांगरभूंय | प्रतिनिधी
केंद्रीय पर्यावरण मंत्रालयान देशांतल्या सगल्या दर्यावेळांचेर शॅकां (शॅक्स) घालपाक मान्यताय दिल्या. पर्यटनाचे नदरेन पळयल्यार हो तसो क्रांतीकारी निर्णय. कारण वेळ मजेन पासार करपाक आयिल्ले देशी- विदेशी पर्यटक शॅकांक भेट दितातूच. थंय सगलें मेळटा. कितें खावप, पिवप तें दरेकल्यान थारावपाचें. तरातरांचें रुचीक नुस्तें आनी सोरो हें तर शॅकांचें (गोंयच्या) खाशेलेंपण. शॅकां घालपा संबंदी 2019 त अधिसुचोवणी काडिल्ली. हालींच केंद्र सरकारान तातूंत दुरुस्ती केल्या. ह्या म्हत्वाच्या बदलांक लागून आतां पर्यटकांची संख्या वाडटली, अशें केंद्राक दिसता. बरी गजाल. पूण, आमच्या गोंयाचेर हाचो वायट परिणाम जावपाची भिरांत आसा. कारण हीं शॅकां फक्त गोंयांतूच आशिल्लीं. हेर कडेन तीं उबारपाक परवानगी नाशिल्ली. ह्या निर्णयाक लागून विदेशी पर्यटक देशांत वाडटले काय नात, तें कळना, मात गोंयच्या शॅकांनी दीस पासार करपाक येवपी पर्यटकांचो आंकडो मात देंवतलो. भिंवपाची गरज आसा. राज्य सरकाराक बेगोबेग उपाय सोदचो पडटलो.
शॅक्स म्हणल्यार तात्पुरती, ताकतिकेन बांदिल्ली खोंप वा केबीन. विदेशांत आवय- बापाय पसून वेगळो जाल्लो भुरगो तातूंत रावता. शेतांत, दर्यावेळेचेर उबारिल्ले खोंपीकूय शॅक्स म्हणटात. गोंयांतले शॅक हे खाण- जेवण, पिवपाक मेळटा तसलें धाकटुलें हाॅटेल. तांचे धनी दर्यावेळाचेंर खाटी, वोल्तेरां दवरतात. मागीर ग्लासांतल्या पेयाचो सीप घेत घेत सुर्यास्त पळोवपाचो वा दोळे धांपून खारो वारो खावपाचो. शॅकां घालपी थारावीक वेवसायीक आसात. ते खातीर जागो मेळचो म्हूण व्हडले वेव्हार जातात. तो खर्च भरता. कारण दर्यावेळेर गेल्लो पर्यटक दिसाक दोन फावट तरी शॅकांनी पावल दवरले बगर रावना. खास करून आधुनिक तरणाट्यां मदीं तर शॅकांची क्रेझ आसा. हाचे वयल्यान, भायल्या राज्यांनी शॅकां जालीं जाल्यार हांगाच्या वेवसायाक धपको बसतलो हें वेगळें सांगपाक नाका. आमच्यो दर्यावेळो संवसारांत फामाद. हांगाची संस्कृताय पूर्व आनी पश्चिमेचो संगम आशिल्ली. इंग्लीश पावला- पावलार आपटता. सगलो वाठार झकपक. गोंयांत पयलेच खेप येवपी ग्रामीण पर्यटकांक तर पणजी शारांत भितर सरतकच दोन- तीन पूल बी पळोवन विदेशांतूच आयिल्ले सारकें दिसता. कांय शारां, म्हानगरां सोडल्यार हेर कडेन हें वातावरण पळोवपाक मेळना. गोंयचें नांव खाची कोनशांनी गाजता, ताचे फाटल्यान हेंय एक कारण. बरेच पर्यटक तर विदेशी फील अणभवपाकूच येतात. अर्थांत हांगाचो सैमूय मनभुलयणो आसा!
आतां केंद्र सरकारान दुरुस्ती केल्ल्यान पुराय देशांत जंय जंय दर्यावेळो आसात, थंय शॅकां घालपाक मेळटलीं. गुजरात, महाराष्ट्र, कर्नाटक, केरळ, तामिळनाडू, आंध्र प्रदेश, ओडिशा, अस्तंत बंगाल ह्या राज्यांक आनी दमण- दीव, पुडुचेरी, अंदमान- निकोबार जुंवीं आनी लक्षद्वीप ह्या केंद्रशासीत प्रदेशांक दर्यावेळ लाबल्या. थंय आतां शॅकां किल्लतलीं. अर्थांत तांचो खाणांचो मेन्यू गोंया सारको आसतलो काय वेगळो, तें येवपी काळूच थारायतलो. गोंय हें पूर्व, पश्चिमी संस्कृतायेचें काॅकटेल. इंग्लिशूय वांगडा आसा. हें वातावरण हेर राज्यांनी निर्माण करप तशें कठीण न्हय. थंयच्या भारतीय संस्कृतीमोगींक मात तें उस्तुरें वचूं येता. गोंयांत पयलीं सावन हें चलता म्हूण ते ओगी आसात. खायात, पियात, मजा करात वृत्ती तांकां पसंत पडतशीं दिसना. घडये सरकाराच्या तोंडा कडेन पळोवन ‘आपलेच ओंठ, आपलेच दांत’ म्हणीत ते स्वताचोच घुस्मटमार करून घेत. पूण जंय विरोधी सरकारां आसात, थंय शॅकां संबंदी कितेंय घडत जाल्यार ते उंचाबळ जावपाक शकतात. तशी पबांत चली पसून गेल्ली तांकां आवडना! दर्यावेळ पर्यटन, रात पर्यटन म्हणल्यार फक्त गुन्यांव, सोरो, ड्रग्स, शिंदळकी असोय भौसाचो समज आसा. तातूंत तथ्य आसा काय तो फक्त गैरसमज हें जाचें ताणें थारावचें. शॅकां, विदेशी पर्यटक येत जाल्यार कोंकणांतली शांत जीण इबाडटली, घुंवळे वखदांक लागून गुन्यांव वाडटले, तरणाटी पिळगी इबाडटली, अशी भिरांत कांय वर्सां पयलीं व्यक्त जाल्ली. ताका लागून दर्यादेगां वयले कांय जिल्हे केंद्र सरकाराचो हो निर्णय कसो कितें घेतात, तें पळोवचें पडटलें.
नदर वता थंय ‘शॅक- शॅक’ जालें म्हूण हरकत ना, मात ताचो थळाव्या लोकांक, राज्याक त्रास जावंक फावना. गुन्यांवकारी वाडूंक फावना. ह्या नव्या धोरणाक विरोध जायतूय बी. घडये अर्थीक कारणाक लागून सगले ओगीय रावत. कारण जायते फावटी खावपाचे आनी दाखोवपाचे दांत वेगवेगळे आसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
