भांगरभूंय | प्रतिनिधी
तिसवाडी, पेडणें, मुरगांव, साश्टे फुडल्या 12 वरां खातीर अलर्ट!
पणजी : पावसान परत नेट धरिल्ल्यान राज्यांतल्या कांय वाठारांनी व्हड प्रमाणांत पावस पडपाची शक्यताय आसा. फाटल्या 24 वरांत राज्यांत सरासरी 4 इंच पावसाची नोंद जाल्या. पणजे सयत ताळगांवच्या कांय वाठारांनी उदक भरपाक लागलां. उत्तर गोंयांत सकाळ सावन पावसान नेट धरला. घांट वाठारांनी तशेंच पेडणें, मुरगांव, सासाश्टी हांगा पालसणां कोसळपाचो धोको हवामान खात्यान उक्तायला. व्हड पावसाक लागून शेतवडीकय धोको आसा अशें सांगलां. शारांत उदक तुंबलें जाल्यार दुकानां बुडपाची भिरांत आसा.
4 जुलयाचे रातीं जारी केल्ले सुचोवणी प्रमाण, बारा वरां भितर पावसाचे परिणाम राज्याक दिसूं येतात.
फाटल्या 24 वरांत म्हापशें शारांत सुमार चार इंच, पणजेत पावणें पांच इंच, पोरण्या गोंयां तीन इंच, काणकोणां सुमार सात इंच, मुरगांव वाठारांत चार इंच, मडगांवां सुमार पांच इंच, केप्यां साडे पाच इंच आनी सांग्यार चार इंच पावसाची नोंद जाल्या.
राज्यांत आतां मेरेन वट्ट 41 इंचा परस चड पावस पडला. फुडले कांय दीस पावस असोच पडत उरलो जाल्यार चार दिसांनी पावस आपली ह्या दिसांतली सरासरी पुराय करतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
