आतां थायलंडाक वचात स्वताचे गाडयेन
भांगरभूंय | प्रतिनिधी
भारत- म्यानमार- थायलंड त्रिपक्षीय म्हामार्ग जातलो
भांगरभूंय । खबरां संस्था
दिल्ली : आतां थायलंडाक वचप जातलें सोपें. विमान चुकल्यार स्वताचे गाडयेन तुमी थायलंडाक वचपाक शकतात. ह्या सैमान भरिल्ल्या देशाक भेट दिवपाक तुमी आतां भारतांतल्यान थायलंड मेरेन लाँग ड्रायव्ह करपाक शकतात. अजाप दिसलें न्हय? थायलंड देशांत वचपा खातीर रस्ते तयार जातात. भारत- म्यानमार आनी थायलंडाक जोडपी असो त्रिपक्षीय म्हामार्ग येवपी चार वर्सांनी तयार जावपाचो आसा.
भारत- म्यानमार- थायलंड त्रिपक्षीय महामार्ग 1360 कि.मी. लांबायेचो आसतलो. भारत, म्यानमार आनी थायलंडाचो हो जोड उपक्रम जावन आसा. कोलकात्त्यांत हालींच जाल्ले बिमस्टेक देशांचे परिशदेंत म्यानमार आनी थायलंडच्या मंत्र्यांनी ह्या रस्ते प्रकल्पाचें काम येवपी तीन ते चार वर्सांनी पुराय जातलें अशी म्हायती दिली.
सध्या प्रकल्पाची परिस्थिती कितें आसा?
म्यानमारांत चडश्या म्हामार्गांचें काम पुराय जालां. 2026 वर्साचे निमाणे कडेन उरिल्लो भाग पुराय जावपाची शक्यताय म्यानमारचे वाणिज्य मंत्री आंग नैंग ओ हांणी उक्तायली. कालेवा ते यार गी मजगतींच्या 121.8 किमी लांबायेच्या म्हामार्गाचे चौपदरीकरण केल्ल्यान ताका आनीक कांय वर्सां लागतलीं.
ह्या रस्त्यांत खंयचीं शारां आनी राज्यां येतलीं
हो त्रिपक्षीय म्हामार्ग कोलकात्त्याक सावन सुरू जाता. उत्तरेक सिलीगुडी मेरेन वचून थंयच्यान तो पुर्वेक वळटलो. उपरांत कुचबिहार रस्त्याच्यान बंगालांत भायर सरतलो आनी श्रीरामपूर शिमे वेल्यान आसामांत प्रवेश करतलो. हो रस्तो उत्तर बंगालांतल्या डुअर्स प्रदेशांतल्यानूय वतलो. तशेंच दिमापुरांतल्यान नागालँडांत प्रवेश करपा खातीर आसामचे पुर्वेच्या वाठारांतल्यान वतलो. म्हामार्ग उपरांत नागालँड आनी मणिपुरच्यान दक्षिणे कडेन वळटलो. इम्फाळांतल्यान फुडें वचून मोरेह रस्त्यान म्यानमारांत (आदलो ब्रह्मदेश) तो प्रवेश करतलो. मोरेहच्यान माई सॉट रस्त्यान मंडाले, नेपिडाव, बागो आनी म्यावाड्डी असो नैऋत्य दिकेन थायलंडांत प्रवेश करतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
