भांगरभूंय | प्रतिनिधी
वास्को: कझाकस्तान सावन चार्टर विमानान बुधवारा फांतोडेर दाबोळी विमानतळार देंविल्ल्या 180 प्रवाशांचें शिश्टाचार मंत्री मॉवीन गुदिन्हो हांणी फुलांतुरो भेटोवन येवकार दिलो. बुधवारा सावन सुरू जाल्ल्या हवाई पर्यटक मोसमाक लागून आपल्याक खोस जाता. ई व्हिसा विशींचो प्रस्न रोखडोच निकालांत काडटले. जेणे करून चडांत चड पर्यटक गोंयांत येतले अशें गुदिन्होन म्हणलें. तांणी दाबोळी विमानतळाच्या प्रस्नाकूय हात घालो. दाबोळी विमानतळा संबंदी विरोधकांनी कितल्योय वावड्यो पातळायल्यो तरी दाबोळी विमानतळ सुरूच उरतलो अशें तांणी परतून एकदां स्पश्ट केलें.
दोन वर्सांच्या कोवीड महामारी उपरांत गोंयांत परतून चार्टर विमानसेवा सुरू जाल्ल्यान आनी आंतरराष्ट्रीय हवाई पर्यटक मोसमाक बुधवारा सावन आरंभ जाल्ल्यान गोंयांतले विवीध वेवसायीक सुखावल्यात. फुडारांत चडांत चड चार्टर विमानां गोंयांत येतलीं. ते खातीर अर्थवेवस्थेक आनी विवीध वेवसायाक उर्जा मेळपाची आस्त वेवसायीक बाळगून आसात.
बुधवारा फांतोडेर कझाकस्तानच्या स्कॉट विमान कंपनीच्या विमानान दाबोळी विमानतळार आगम जाल्ल्या पर्यटकांचें बॅण्डाचेर विवीध प्रकाराची धून वाजोवन येवकार दिलो. ह्या वेळार हाजीर आशिल्ले पर्यटक विभागाचे अधिकारी, कर्मचारी हांणी लेगीत फुलांतुरो भेटोवन पर्यटकांक येवकार दिलो. मंत्री मॉवीन गुदिन्हो हांणी खासा हाजेरी लायिल्ली. तांचे हस्तुकीं केप कापलो
संवसारभरांत पर्यटन थळ म्हूण गोंयाक चड पसंती दितात. हांगासरल्या हवाई प्रवाशांची संख्या वाडत आशिल्ल्यान दोन विमानतळाची गरज निर्माण जाल्या. दोन वर्साच्या कोवीड म्हामारी उपरांत हवाई पर्यटन मोसमाक आरंभ जाल्ल्यान म्हाका खोस भोगता. 3 नोव्हेबरा सावन रशिया उपरांत युके आनी हेर देशांतलीं चार्टर विमानां येतलीं अशें गुदिन्होन म्हणलें. दाबोळी विमानतळ सुरूच उरतलो, तेच प्रमाण थंयच्या प्रवाशांची संख्या लेगीत वाडटली अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
