भांगरभूंय | प्रतिनिधी
म्हापशें: 15 लाख रुपया ओव्हेल्टी रक्कम न्यायालयांत जमा केल्ल्याचें भासोवन आनी न्यायालयाची बनावट पावती तयार करून न्यायालया सयत आपल्या अशिलाची फटवणूक केल्ल्या प्रकरणांत दुबावीत अॅड. विश्राम ताळगांवकार (म्हापशें) ह्या वकिलाचो अटकपूर्व जामीन अर्ज म्हापशेंच्या फास्ट ट्रॅक न्यायालयान भायरायलो.
म्हापशें पयलो वर्ग न्यायालयाचे न्यायाधीश शिल्पा पंडीत हांच्या कागाळीच्या आदारान पुलिसांनी हो गुन्यांव 12 एप्रील 2022 दिसा नोंद केल्लो. हो प्रकार फाटल्या 11 सप्टेंबर 2017 दिसा घडिल्लो. म्हापशेंच्या पयलो वर्ग न्यायालयांत वंदना अनंत पळ हांचो 2010 वर्सा वारस हक्क (इन्वेंटरी प्रक्रिया) खटलो दाखल केल्लो.
ह्या खटल्या प्रमाण पळ हांणी अरविंद देसाय आनी विना देसाय ह्या आपल्या सोयऱ्यांक 15 लाख रुपया ओव्हेल्टी रक्कम दिवपाची आशिल्ली. सप्टेंबर 2017 वर्सा वंदना पळ हांणी वयली ओव्हेल्टी रक्कम न्यायालयांत जमा करपा खातीर आपलो वकील दुबावीत अॅड. विश्राम ताळगांवकार हाचे कडेन दिली. तांणी सदर रक्कम न्यायालयांत जमा करूंक नाशिल्ल्याचें सांगून रक्कम जमा केल्ल्याची पावती पळ हांचे कडेन दिली. हे पावतीचेर 11 सप्टेंबर 2017 ही तारीख आशिल्ली.
ही पावती पळ हांणी तांच्या वयर दिल्ल्या सोयऱ्यां कडेन दिली. ओव्हेल्टी पयशांचेर दावो करून ते न्यायालया कडल्यान मेळोवपा खातीर ती पावती अरविंद देसाय आनी विना देसाय हांणी न्यायालयांत सादर केली. सदर पावती प्रमाण वयली 15 लाख रुपया ओव्हेल्टी रक्कम न्यायालयांत जमा जाल्ली ना. तशेंच ही पावती बनावट आशिल्ल्याचें न्यायालयाचे नदरेन आयलें. हे पावतीचेर न्यायालयाचो स्टॅम्पूय नाशिल्लो.
हो प्रकार समजतकूच ह्या प्रकरणाची न्यायालयान अंतर्गत चवकशी केली. तशेंच 21 साक्षिदारां सयत ह्या प्रकरणाचो अहवाल जिल्हो न्यायालयांत सादर केलो. उपरांत न्यायाधीश शिल्पा पंडीत हांणी न्यायालय तशेंच खटल्यांतल्या स्वारस्य पक्षांची फटवणूक आनी बनावटगिरी प्रकरणांत पुलिशेंत कागाळ दाखल केली. ते प्रमाण पुलिसांनी दुबाविता आड भा.दं.सं.च्या 465, 466, 467, 468, 471 आनी 420 कलमा खाला गुन्यांव नोंद केल्लो.
ह्या प्रकरणांतली अटक चुकोवपा खातीर अॅड. ताळगांवकारान फास्ट ट्रॅक तशेंच अतिरिक्त जिल्हो आनी सत्र न्यायालयांत धांव घेतिल्ली. ह्या अटकपूर्व जामीन अर्जाचेर न्यायालयांत सुनावणी जाली. दोनूय वटानचे युक्तीवाद आयकले उपरांत प्रथम दर्शनी अर्जदाराचो ह्या प्रकरणांत वांटो आशिल्ल्याचें दाखयलां. हे खातीर तपास अधिकाऱ्यांक चवकशीची संद दिवपा खातीर अर्जदार अटकपूर्व जामीन मेळोवपाक पात्र नाशिल्ल्याचें स्पश्ट करून हो अर्ज न्यायालयान भायरायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
