भांगरभूंय | प्रतिनिधी
भांगरभूंय । प्रतिनिधी
वास्कोः मुख्यमंत्री डॉ प्रमोद सावंत हांणी सुरू केल्ले अप्रेंटीस नोंदणी येवजणेंतल्यान फुडाराक वास्कोंतल्या सुमार 500 तरणाट्यांक सरकारी नोकऱ्यो मेळपाक शकतल्यो अशें वास्कोचो भाजप आमदार कृष्णा साळकार हांणी सांगलें. मेगा अप्रेंटीस नोंदणी मेळाव्याचें उक्तावण केल्या उपरांत ते पत्रकारां कडेन उलयताले. येवजणेचो फायदो घेवपाचें आवाहन तांणी बेकार आशिल्ल्या तरणाट्यांक केलां.
फुडाराक सरकारी नोकऱ्यो मेळोवपाची तरणाट्यांक ही येवजण म्हणल्यार भांगराची संद आसा. अप्रेंटीस येवजणे खाला नोकरे खातीर तयार करपा खातीर प्रशिक्षण, कुशळताय वाडोवपाची संद मेळटली. शिवाय तांकां स्टायपंड आनी कामाचो अणभव मेळटलो. फुडाराक सरकारी नोकरी करपा खातीर ते तयार आसतले. राज्यांतलो बेरोजगारीचो प्रश्न सुटावो करपा खातीर मुख्यमंत्र्यान सुरू केल्ली ही एक सामकी बरी येवजण आसा अशें साळकारान सांगलें.
अप्रेंटीस येवजणे खाला कामाक घेतिल्ल्यांक श्रेणी प्रमाण बरो स्टायपेंड मेळटलो. पदवी शिक्षण घेतिल्ल्याक स्टायपंड म्हणून चडांत चड म्हयन्याक 13 हजार रुपये मेळपाक शकतले. हे येवजणे खाला उमेदवारांक कामाचो जाय तो अणभव मेळटलो. सरकारी नोकऱ्यांत तांकां प्राधान्य मेळटले अशें तांणे सांगलें.
अप्रेंटीस नोंदणी येवजणेक वास्को मतदारसंघांतल्या तरणाट्यांचो बरो प्रतिसाद मेळटा. पयल्याच दिसा सुमार दोनशें तरणाट्यांनी नांव नोंदणी केली. फुडले तीन दीस ही नोंदणी सुरू आसतली. राज्यांत सध्या बेरोजगारी दिसान दीस वाडत आसा. अश्या वेळार मुख्यमंत्र्यान एक बरी येवजण सुरूकरून तरणाट्यांक थाकाय दिवपाचो यत्न केला अशें साळकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
