भांगरभूंय | प्रतिनिधी
फोंडें: अंत्रुजनगर कुट्टी हांगासरल्या मुखेल रस्त्याचे कुशीक आशिल्ले इमारतीच्या तिसऱ्या माळ्यार रावपी विठ्ठल प्रभू हांचे मालकीचो फ्लॅट दिसा उजवाडा फोडून अनवळख्यांनी भांगराच्या वस्ती सयत रोख देड लाख रुपया फारायले. फ्लॅटांत कोणूच नाशिल्ल्याची संद सादून अनवळखी चोरांनी चोरी केली. रातीं उसरां मेरेन फोंडें पुलीस घडणुकेचो पंचनामो करपाक व्यस्त आशिल्ले.
फोंडें पुलिसांनी दिल्ले म्हायती प्रमाण तिसऱ्या माळ्यार फ्लॅटांत रावपी विठ्ठल प्रभू आनी तांची धूव मंगळारा सकाळीं फ्लॅटांतल्यान भायर सरिल्लीं. बापूय वेर्ण्यां नोकरेक गेलो, जाल्यार धूव कॉलेजींत गेली.
दनपारां धूव कॉलेजींतल्यान परतले उपरांत ताका फ्लॅट फोडिल्ल्याचें दिसून आयलें. फ्लॅटांत रोख देड लाख आनी भांगराच्यो वस्ती आशिल्ल्यो. विठ्ठल प्रभू हांची घरकान्न चार-पांच वर्सां पयलीं संवसाराक अंतरिल्ली. घरकान्नीच्यो आनी धुवेच्यो भांगरा वस्ती फ्लॅटांतूच दवरिल्ल्यो. अनवळख्यांनी फ्लॅटांत कोणूच नाशिल्ल्याची संद सादून रोख रक्कम आनी भांगर फारायलें.
फोंडें पुलीस स्टेशनाचे उपनिरिक्षक परेश सिनारी हांणी फ्लॅटांत वचून घडणुकेचो पंचनामो केलो. रातीं उसरां वास घेवपी सुणीं आनी ठशे तज्ञांक आपयले. निरिक्षक विजयकुमार चोडणकार हांच्या मार्गदर्शना खाला पुलीस तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
