भांगरभूंय | प्रतिनिधी
69,303 लोकां मदीं 28,031 पासपोर्ट गोंयांत सरेंडर
नवी दिल्ली : फाटल्या 12 वर्सांच्या काळांत 70 हजार भारतीयांनी आपले पासपोर्ट सरेंडर केल्यात. ही खबर एका राष्ट्रीय दिसाळ्यान दिल्या. 2011 ते 2022 मेरेन 6,303 भारतीयांनी पासपोर्ट परत केल्यात. तातूंत 90 टक्के लोक गोंय, पंजाब, गुजरात, महाराष्ट्र, केरळ, तामिळनाडू, दिल्ली, चंडिगडा कडेन संबंदीत आसात. आरटीआय वरवीं मागिल्ले म्हायतींत केंद्र सरकारान ही जाप दिल्या.
पासपोर्ट सरेंडर करपी 40.45 टक्के (28,031) लोकांनी ते गोंयांतल्या पासपोर्ट कार्यालयांत परत केल्यात. हातूंत कितले गोंयकार आसात, तें कळूंक ना. हो पासपोर्ट परत करपा विशींचो आंकडो भारतीय कार्यालयांचो. विदेशांतल्या भारतीय दुतावास, उच्चायोग कचेरेंत कितल्या जाणांनी ते सरेंडर केल्यात, तें जाहीर जावंक ना.
अंदूं 24 मार्चाक संसदेंत विदेश राज्य मंत्री मुरलीधरन हांणी दिल्ले म्हायती प्रमाण, 2011 ते आॅक्टोबर 2022 मेरेन 16 लाख 21 हजार 921 भारतीयांनी आपली नागरिकता सोडल्या. ते कायमचे विदेशांत स्थायीक जाल्यात.
भारतीय नागरी कायदो 1956 प्रमाण, मूळ भारतीयांक दोन नागरिकत्वां स्विकारपाची परवानगी ना. जर कोण दुसऱ्या देशाचो नागरीक जाला, जाल्यार ताका भारतीय पासपोर्ट सरेंडर करचो पडटा. पुर्तुगालांत दोन नागरिकत्वां कायद्यान घेवपाक मेळटात.
सरकारी म्हायती प्रमाण, 2011 पसून दर वर्सा 11,422 भारतीयांनी नागरिकत्व सोडलां. जाल्यार ह्याच काळांत दर म्हयन्याक 482 भारतीयांनी पासपोर्ट सरेंडर केल्यात.
पासपोर्ट परत दिवपाचो वर्सुकीं आंकडो :
2011 – 239
2012- 11,492
2013- 23,511
हातूंत गोंय दरवर्सा नंबर वन आसा. 2014 त पासपोर्ट सरेंडर करपी भारतीयां मदीं 90 टक्के गोंयांतले लोक आशिल्ले.
पुर्तुगाल कनेक्शन व्हडलें कारण
1961 वर्सा पयलीं गोंयांत जल्मल्ले लोक आनी तांच्यो दोन पिळग्यांक पुर्तुगालाचे नागरीक जावपाक मेळटा. त्या वर्सा गोंय मुक्त जालें. पुर्तुगाल पासपोर्ट आशिल्ल्यांक फक्त पुर्तुगालूच न्हय, जाल्यार युरोपांतल्या खंयच्याय देशांत वचपाक मेळटा. युरोपियन समुहांतल्यान भायर सरिल्ल्या देशांत वचपाक मेळचें ना
पासपोर्ट सरेंडर करप्यांत गोंय नंबर वन
पासपोर्ट सरेंडर करप्यां मदीं गोंय नंबर वन आसा. गोंयांत 28,031 जाणांनी पासपोर्ट सरेंडर केल्यात. उपरांत पंजाब चंडिगड सयत 9557, उपरांत गुजरात 8918 जाणांनी पासपोर्ट परत करून विदेशांत स्थलांतर केला. महाराष्ट्रांत 6545, केरळ 3675 अानी तामिळनाडूंत 2946 लोकांनी विदेशांत स्थलांतर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
