सोदनिबंदा फाटल्यान गोंयच्या अस्तित्वा आड येवपी शक्तींचो हात

भांगरभूंय | प्रतिनिधी

राजेंद्र केरकार हांचो दुबाव; सरकारान खर पावलां उबारपाची मागणी

पणजी: म्हादय प्रस्नाचेर सर्वोच्च न्यायालयांत सुनावणी सुरू आसतनाच राष्ट्रीय दर्या विज्ञान संस्थेच्या (एनआयओ) तीन शास्त्रज्ञां कडल्यान जो सोदनिबंद सादर जालां, ताचे फाटल्यान गोंयच्या अस्तित्वा आड येवपी शक्तींचो हात आशिल्ल्याचो आपल्याक दुबाव आसा. अशा शक्तीं आड गोंय सरकारान खर पावलां उबारपाची गरज आसा अशें पर्यवरण मोगी राजेंद्र केरकार हांणी सोमारा पत्रकारां कडेन उलयतना सांगलें.

म्हादय उदका तंटो लवादाच्या निमाण्या आदेशा प्रमाण म्हादय न्हंयचें उदक घुंवडायल्यार ताचो पुराय गोंयचेर व्हडलोसो परिणाम जावचो ना असो अहवाल ‘एनआयओ’च्या के. अनील कुमार, डी. शंकर आनी के. सुप्रीत हांणी तयार केला आनी तो उजावाडाय आयला. हाचे वेल्यान गोंयचें राजकारण तापलां.

रिव्हॉल्युशनरी गोवन्स (आरजीपी), काँग्रेस ह्या विरोधी पक्षां सयत पर्यावरण मोगींनीय ‘एनआयओ’ आनी गोंय सरकाराचेर टिका करपाक सुरवात केल्या. तातूंत ‘एनआयओ’च्या शास्त्रज्ञांक गोंय सरकारान म्हादय विशीं अहवाल तयार करपाक सांगूंक नाशिल्लें. ताका लागून ह्या अहवालाचो सरकारा कडेन कसलोच संबंद ना. तशेंच ह्या अहवालाचो सर्वोच्च न्यायालयांतले सुनवणीचेरूय कसलोच परिणाम जावचाे ना अशें मुख्यमंत्री डॉ. प्रमोद सावंत हांणी स्पश्ट केलां.

हे फाटभुंयेर उलयतना म्हादय विशीं केंद्र सरकारान स्थापन केल्ल्या उदका तंटो लवादान 14 ऑगस्ट 2018 दिसा दिल्ल्या निमाण्या निवाड्याक तिनूय राज्यांनी सर्वोच्च न्यायालयांत आव्हान दिलां. थंय ह्या प्रकरणाची सुनावणी सुरू आसतनाच ‘एनआयओ’ सारक्या प्रतिश्ठीत संस्थेच्या शास्त्रज्ञां कडल्यान अशे तरेचो सोदनिबंद सादर जावप धक्को दिवपी आसा. ह्या सोदनिबंदा फाटल्यान गोंयच्या अस्तित्वा आड येवपी शक्तींचो हात आशिल्ल्याचो आमचो दुबाव आसा. ताका लागून सरकारान हाची खोलायेन चवकशी करून अशा शक्तींचेर ताकतिकेन कारवाय करप गरजेचें आसा अशेंय केरकार हांणी सांगलें.