भांगरभूंय | प्रतिनिधी
फोंडें: सुकतळे-मोल्यां राष्ट्रीय म्हामार्गार सोमारा दनपारां 1 वरांच्या सुमाराक 3 चारचाकी वाहनां मदीं जाल्ल्या अपघातांत विनय देसाय (35, बिजापूर-कर्नाटक) हाका जाग्यारूच मरण आयलें. कुळें पुलिसांनी अपघाताचो पंचनामो करून मोटार चालक अंकीत जयसिंग जाधव (बिजापूर) हाका अटक केल्या.
मेळिल्ले म्हायती प्रमाण जीए 05 डी 6556 क्रमांकाची जीप मोलें सावन फोंड्यां वताली. सुकतळे पावतकूच जीप चालक आनी हेर एकलो रस्त्याचे कुशीक जीप पार्क करून मुतपा खातीर गेल्ले. त्याच वेळार मोलें सावन अतीगतीन आयिल्ले एमएच 13 ए झेड 6448 क्रमांकाची वेर्णा कार विरुद्ध दिशेन येवपी केए 28 झेड 2233 क्रमांकाचे क्रेटा मोटारीक धपको दिलो. हातूंत क्रेटा मोटार रस्त्याचे कुशीक आशिल्ल्या झाडाक धपको दिले उपरांत पार्क केल्ले जीपीक वचून धपको दिलो. हातूंत क्रेटा मोटारीक धपको दिल्ली वेर्णा मोटार अदमाशेक 150 मिटर अंतराचेर वचून रस्त्याचे कुशीक लवंडली. अपघातांत वेर्णा मोटारींतले 4 जाण सुदैवान वाटावले.
अपघाताची म्हायती मेळटकूच कुळें पुलिसांनी घडणूक थळार धांव घेतली. निरिक्षक जिवबा दळवी हांच्या मार्गदर्शना खाला उपनिरिक्षक अजय धुरी हांणी अपघाताचो पंचनामो केलो. ह्या अपघात प्रकरणांत वेर्णा मोटार चालक अंकीत जाधव हाका अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
