भांगरभूंय | प्रतिनिधी
मुख्यमंत्र्यांच्या हस्तुकीं जी-फूड महोत्सवाचें उक्तावण
पणजी: हो उत्सव न्हय फकत खाद्यपदार्थां पुरतो मर्यादीत नासून तो गोंयच्या खाद्यसंस्कृतीची वळख, संदी आनी महिला सक्षमीकरणाचें प्रतीक आसा. गोंयच्यो बायलो अन्न प्रक्रिया, खाणांजेवणां, कृशी, हस्तकला आनी लघु उद्देगांनी सक्रियपणान वावरतनाच ग्रामीण अर्थवेवस्था घटमूट करपात म्हत्वाची भुमिका करतात, अशें मुख्यमंत्री डॉ. प्रमोद सावंत हांणी सांगलें.
ग्रामीण उदरगत संचालनालयाच्या गोंय राज्य ग्रामीण उपजीविका मिशना खाला आयज लोक भवनाच्या झुवारी हॉलांत आयोजीत जी-फूड फेस्टिव्हलाचे उक्तावण डॉ. सावंत हांचे हस्तुकीं जालें. ह्या वेळार ते मुखेल सोयरे म्हणून उलयताले. गोंयच्या पारंपरीक खाद्यसंस्कृतीक उर्बा दिवप, तशेंच आपमजत गटांखातीर संरचित बाजारपेठ निर्माण करप आनी तांचो वेवसायीक नेटवर्काकडेन संपर्क घटमूट करप हो ह्या महोत्सवाचो मुखेल उद्देश आसा.
तांणी फुडें नमूद केलें, मुख्यमंत्री अन्नपूर्णा येवजणे खाला बायलांच्या फुडारपणा खाला बचत गट यशस्वीपणान कॅन्टीन चलयतात आनी अथीर्र्क येणावळीचें साधन निर्माण करतात. हो महोत्सव उत्पादक आनी हॉटेल, रेस्टॉरंट तशेंच किरकोळ विक्रेत्यां सयत खरेदीदार हांच्यामदी थेट संवाद साधपा खातीर एक माची दिता. तांणी आदरातिथ्य क्षेत्रांतल्या आनी हेर वेवसायिकांक बचत गटां वांगडा सहकार्य करून थळाव्या उत्पादनांक प्रोत्साहन दिवपाचे आवाहन केले.
जी-फूड फेस्टिव्हल हे ग्रामीण उपजीविका घटमूट करपाच्या, महिला-फुडारपणा खालच्या उद्देगांक सक्षम करपाच्या आनी गोंयच्या उत्पादनांक राष्ट्रीय आनी संवसारीक बाजारपेठेंत स्थान मेळोवन दिवपाचे दिकेन उबारिल्लें एक म्हत्वाचें पावल आसा. ह्या महोत्सवात गोंयची जीआय-टॅग आशिल्ली गोंयची फेणी, काजू, मानकुराद आंबो, बेबिंका आनी हेर उत्पादनां प्रदर्शीत केल्लीं.
हे कार्यावळीक आमदार डॉ. देविया राणे, अनिवासी भारतीय आयुक्त नरेंद्र सावयकयर, जीसीसीआय संचालक संजय आमोणकार, दक्षीण गोंय डीआरडीए प्रकल्प संचालक श्रीमती दीपाली नायक, उत्तर गोंय डीआरडीए प्रकल्प संचालक संगम पाटील आनी हेर अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
