भांगरभूंय | प्रतिनिधी
-भोवतेक पोरण्यो इमारती पाडपाचे नगरविकास खात्याचे निर्देश
पणजी : राज्यांतल्या सात पालिकां वाठारांतल्यो 107 इमारती घातक स्थितींत आसात. तातूंतल्यो भोवतेक इमारती पाडपाचे निर्देश दिल्यात, अशें नगरविकास मंत्री विश्वजीत राणे हांणी विधानसभेंतल्या लेखी प्रस्नाचे जापेंत स्पश्ट केला.
आमदार व्हेंझी व्हिएगस हांणी हे विशीं प्रस्न विचारिल्लो. राज्यांत दिवचल आनी कुडचडें ह्या दोन पालिकां कडेन आपल्या कार्यक्षेत्रांतल्या धोक्याच्या इमारतींचो डाटा ना. जाल्यार कुंकळ्ळी, केपें, सांखळी आनी वाळपयंत घातक स्थितींत इमारती नाशिल्ल्याचे मंत्री राणे हांणी जापेंत नमूद केलां.
मंत्री राणे हांणी जारी केल्ले आंकडेवारी प्रमाण, मुरगांव पालिका वाठारांत घातक स्थितींत आशिल्ल्या इमारतींचो आंकडो चड आसा. थंय खाजगी आनी सरकारी मेळून 41 इमारती घातक स्थितींत आसात. ते उपरांत म्हापश्यां 20, मडगांवां 19, पणजे 17, काणकोणां 6 जाल्यार पेडणें आनी फोंडें ह्या दोन पालिका वाठारांत दरेकी दोन इमारती घातक स्थितींत आशिल्ल्याचे दिसून येता.
हातूंतल्यो कांय इमारती केन्नाय पडपाक शकतात, अशें परिस्थितींत आशिल्ल्यो इमारती पाडच्यो आनी देखभाल नाशिल्ल्या इमारतींची बेगोबेग दुरुस्ती करची अशा प्रकाराच्यो नोटिसी संबंदींत इमारतींच्या धनयांक धाडल्यात, अशेंय मंत्री राणे हांणी जापेंत नमूद केलां.
मजगतीं, राज्यांतल्याे पोरण्याे आनी घातक स्थितींतल्यो इमारती पावसाळ्यांत पडपाची शक्यताय आसता. ताका लागून वित्त लुकसाणी सयत जिविताक धोको उप्रासूं येता. कांय पोरण्यो इमारती जायत्या वर्सां पसून बंद स्थितींत आसात. ताका लागून अशा इमारतींचो डाटा नगरविकास खात्याक सादर करपाची सुचोवणी कांय दिसां पयलीं संचालकांनी पालिका अधिकाऱ्यांक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
