भांगरभूंय | प्रतिनिधी
भांगरभूंय I प्रतिनिधी
काणकोण ः गोंयांत पयलेच फावट छत्रपती शिवाजी महाराजाचो शिवराज्याभिशेक दीस काल सरकारी पांवड्यार मनयलो.
गोंय सरकाराच्या विंगडविंगड कार्यालयांनी शिवरायाच्या पुतळ्याक, फोट्याक हार घालून हो सुवाळो मनयलो.
काणकोणच्या सरकारी संकुला लागसार उपजिल्हाधिकारी कार्यालयाचे वतीन हो सुवाळो जालो. ह्या सुवाळ्याक मुखेल सोयरे म्हणून काणकोणचे आमदार आनी सभापती रमेश तवडकार हाजीर आसले. तांणी महाराजाच्या पुतळ्याक फुलांहार घालो. ह्या वेळार उपजिल्हाधिकारी रमेश गांवकार, मामलेदार मनोज कोरगांवकार, गटविकास अधिकारी अनिल नायक, डाॅ. दिवाकर वेळीप, आदले उपनगराध्यक्ष किशोर शेट, हिंदवी स्वराज संघटणेचे अध्यक्ष दिलखुश शेट, हेर सरकारी अधिकारी आनी कर्मचारी हाजीर आसले.
सरकारी पांवड्यार शिवराज्याभिशेक दीस सुवाळ्याचें आयोजन करप हो डाॅ. प्रमोद
सावंत सरकाराचो तोखणायेचो
निर्णय. हे आदींच हो निर्णय
घेवंक जाय आसलो. दरवर्सा हो सुवालो व्हडा प्रमाणांत मनोवंक जाय अशें सभापती रमेश तवडकार हांणी सांगलें.
भारत देश हो समृद्ध देश आशिल्ल्यानूच हेर देशांनी भारताचेर आक्रमणां केलीं. तीं आक्रमणां मोडून काडपाचें बळगें शिवाजी महाराजान दाखयलें. भारताक सगल्यांत पयलीं स्वातंत्र्य मेळोवन दिवपाचो मान शिवाजी महाराजाक मेळटा अशें तवडकार हांणी सांगलें.
उपजिल्हाधिकारी रमेश गांवकार हांणी येवकार दिलो आनी
प्रास्तावीक केलें. कार्यावळीचें सुत्रसंचालन मु्ख्य लिपीक प्रमोद नायक गांवकार हांणी केलें आनी तांणीच उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
