भांगरभूंय | प्रतिनिधी
गोंय कोमुनिदाद दुरुस्ती कायदो अधिसुचीत
पणजी : काँग्रेस तशेंच हेर विरोधी पक्षांचो विरोध आसतना संमत जाल्ले कोमुनिदाद दुरुस्ती विधेयकाची अधिसुचोवणी जारी जाल्या. राज्यपालांचे मान्यताये उपरांत अधिसुचोवणी जारी जाल्या. कोमुनिदादीच्या सहमतीन सरकारी प्रकल्पां खातीर जमीन संपादीत करपाचो अधिकार आतां सरकाराक फावो जाला.
कोमुनिदाद कायद्यांत ही दुरुस्ती जाल्या. कोमुनिदादीच्या कारभारांत गैरवेव्हार जालो जाल्यार समिती बरखास्त करून प्रशासकी समिती नेमपाचो अधिकार सरकाराक आसा. अर्थीक स्थिती सुदारपा खातीर सरकाराच्या मान्यतायेन जमीन खाजगी संस्थांक दिवपाची मेकळीक कोमुनिदादीक आसा. कोमुनिदादची वेंचणूक प्रक्रिया सुटसुटीत करपाची तजवीज विधेयकांत आसा.
विधानसभा अधिवेशनांत 31 मार्च 2023 दिसा हें विधेयक संमत जाल्लें. हाचे उपरांत 16 जूनाक राज्यपालांनी विधेयकाक मान्यताय दिल्ली. अधिसुचोवणी जारी जाल्ल्यान आतां ताचें कायद्यांत रुपांतर जालां. ह्या दुरूस्ती विधेयकाक राज्यपालांनी मान्यताय दिवची न्हय, अशी मागणी करपी निवेदन काँग्रेस तशेंच गोवा फॉरवर्डान राज्यपालांक सादर केल्ले. अधिसुचोवणी जारी जाल्ल्यान परतून वाद निर्माण जावपाचीं चिन्नां आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
