भांगरभूंय | प्रतिनिधी
केंद्र सरकाराचो निर्णयः शॅक्स आशिल्लें गोंयचेंच खाशेलेपण
भांगरभूंय I प्रतिनिधी
पणजी : गोंयच्यो दर्यादेगो हें राज्याचें एक खाशेलेपण. शॅक्साक लागून दर्यादेगांचें खाशेलेपण वाडटा. आतां गोंया भशेन हेर राज्यांतल्या दर्यादेगांचेर लेगीत शॅक्स उबे रावतले. शॅक्स उबारपाक केंद्रान मान्यताय दिल्या. हाका लागून गोंयच्या दर्यादेगांचें म्हत्व कांय प्रमाणांत उणें जातलें.
केंद्रीय रानां आनी पर्यावरण मंत्रालयान हालींच दर्यादेग नेमन वाठारांत दुरुस्ती करतना सगल्या राज्यांक शॅक्स उबारपाची मेकळीक दिल्या. तशेंच परंपरीक पद्दतीन नुस्तेमारी आनी थळाव्या लोकांक रेंव काडपाक मान्यताय दिल्या. तंत्रीक पद्दतीन मात रेंव काडपाक मेळची ना. तशेंच रेंव काडपा खातीर परवाने घेवपाची अट आसा. केंद्रीय रानां आनी पर्यावरण मंत्रालयान हालींच हे दुरुस्तेक मान्यताय दिल्या.
शॅक्स हे कायमस्वरूपी आसचे नात. पावसांत ते बंद आसतले. पावस सोंपले उपरांत पर्यटन हंगामांत ते चलतले. ही अट पयलीं सारकीच आसा. हातूंत बदल जावंक ना. मिरामार, कळंगूट, कोलवा, गालजीबाग ह्यो दर्यादेगो पुराय संवसारांत फामाद आसात. युरोपी तशेंच हेर देशांचे पर्यटक दर्यादेगांची खोस घेवपा खातीर गोंयांत येतात. दर्यादेगांचेर आसपी शॅक्सांनी वचून ते गोंयचें नुस्तें तशेंच गोंयच्या जेवणाचो आस्वाद घेवप साहजीक आसता. शॅक्सांक लागून दर्यादेगांचेर बरोच काळ रावप शक्य
जाता.
इतलो तेंप गोंयच्याच दर्यादेगांचेर शॅक्स आसताले. महाराष्ट्र, गुजरात, केरळ ह्या राज्यांनी दर्यादेगो आसात. पूण थंयच्या दर्यादेगांचेर शॅक्स उबारपाक मान्यताय नाशिल्ली. हाका लागून शॅक्स हें गोंयचेच खाशेलेपण आशिल्लें. आतां हें खाशेलेपण ना जातले. दर्यादेगांचे सर्वोत्तम वेवस्थापन जावन पर्यटकांचो आंकडो वाडचो अशें केंद्रीय पर्यटन मंत्रालयाचे यत्न आसात. दर्यादेग नेमन वाठारांत जी दुरुस्ती जाल्या हो ह्या यत्नाचो भाग आसा. महाराष्ट्र, केरळ, कर्नाटक ह्या राज्यांनी दर्यादेगो आसात. पूण ह्या राज्यांतल्यो दर्यादेगो गोंयां इतल्यो फामाद नात. हेर राज्यां परस पर्यटक गोंयच्या दर्यादेगांक पसंती दितात.
गोंयांत आतां पर्यटन हंगाम सुरू जाला. पर्यटक येवपाक लागिल्यान शॅक्सांनी गर्दी जावपाक लागल्या. नव्या वर्साक पर्यटकां सयत बऱ्योच महनीय व्यक्ती राज्यांत येतात. अंदूं दर्यादेगेचेर सनबर्न महोत्सव लेगीत जावपाचो आसा.
शॅक्साचे वेवस्थापन करपा खातीर पर्यटन खात्यान शॅक्साचें धोरण तयार केलां. कोयरा खातीर स्वतंत्र शुल्क लागू केलां.
दर्यादेग नेमन वाठारांत बांदकाम वा वेवसायीक कार्यावळी करपाची परवानगी मेळना. नुस्तेमार तशेंच थळाव्या लोकांक दर्यादेगां वयले शंख, शिंपले एकठांय करपाची मेकळीक दिल्या.
सीआरझेड वाठारांत बांद, जेटी तशेंच ल्हान प्रकल्प उबारपाक मान्यताय दिवपाची राज्यांची मागणी आशिल्ली. जेटी, बांद तशेंच ल्हान प्रकल्पांक मान्यताय दिवपाचे अधिकार राज्यांक दिल्यात.
दर्यादेगांचेर वर्सभर शॅक्स आसपाक मेकळीक
पावसांत शॅक्स बंद आसतले. पूण हंगामा उपरांत ते मोडपाची अट ना. खंयच्याय हंगामांत शॅक्स दर्यादेगेर दवरपाची आतां मेळकीक आसा. पावसात शॅक्स बंद दवरपाची मागणी गोंय तशेंच महाराष्ट्रान केल्ली. पावसांत शॅक्स बंद आसतले तरी शॅक्साची खोप वा हेर सामान दर्यादेगेर आसपाक हरकत ना. दर्यादेगेच्या भरती रेशे सावन 500 मिटराचो वाठार दर्यादेग नेमन वाठारांत येता. न्हंयो, खारीज हांचे खातीर दर्यादेग नेमन वाठार 100 मिटराचो आसा.
2011च्या नेमांत सुदारणा
दर्यादेग नेमन वाठार 2011च्या नेमांत शॅक्सांचो उल्लेख आशिल्लो. 2019 वर्सा सुदारीत अधिसुचोवणी जारी जाल्ली. तातूंत शॅक्साचो उल्लेख नाशिल्लो. शॅक्साची तजवीज करपा खातीर आतां केंद्रीय रानां आनी पर्यावरण मंत्रालयान कायद्यांत दुरुस्ती केल्या. हेर राज्यांच्या दर्यादेगाचेर शॅक्सांक दिल्ली मान्यताय हो व्हड निर्णय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
