भांगरभूंय | प्रतिनिधी
फतेहगड: साहिब, फतेहगड-पंजाब हांगा भक्तांनी भरिल्ली बस उमथली. हातूंत ६ भक्तांक मरण आयलें जाल्यार १५ जाण जखमी जाले. जखमी जाल्ल्या सगल्यांक रोखडेंच लागसारच्या हॉस्पिटलांत दाखल केल्यात आनी तांचेर सध्या उपचार सुरू आसात. अपघात जाल्ले बशींत ४० भक्त आशिल्ले. काल रातीं उसरां ही घडणूक घडली.
भावीक आनंदपूर साहिब हांगच्या बैसाखी मेळ्यांतल्यान परत येताले. मजगतीं, बस्सी पठाणा हांगच्या मैण माजरी गांवा लागसार बसींत तांत्रीक इबाड जालो. उपरांत बस अनियंत्रित जावन लायटीच्या खांब्याक आदळ्ळी आनी उमथली.
अपघाता उपरांत घडणुके सुवातेर बरोच बोवाळ जालो. हे विशीं म्हायती मेळटांच थळावे पुलीस आनी रेस्न्यू पंगड रोखडेच घडणुके सुवातेर पावले. तांणी येवन रेस्न्यू ऑपरेशन सुरू केलें. ह्या अपघातांत जखमी जाल्ल्यांक मोरिंडा, फतेहगड साहिब हांगच्या हॉस्पिटलांत दाखल केले. तशेंच गंभीर जखमी भाविकांक चंदीगड पीजीआय हांगा धाडले. जखमी जाल्ल्यां मदीं भुरग्यांचोय आसपाव आसा.
थळाव्यांच्या म्हणण्या प्रमाण, काल रातीं उसरां बस उमथली. थंयच्यान वचपी लोकांनी हो अपघात पळयलो तेन्ना तांणी आशिकुशीकच्या गांवांत संपर्क केलो. लोक रातीं घडणुके सुवातेर पावले आनी तांणी बसींत आडकल्ल्या लोकां भायर काडले. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
