शिवमोगींक खुबळायिल्ल्यानूच कायदो आनी सुवेवस्थेचो प्रस्न: जोजफ सिक्वेरा

भांगरभूंय | प्रतिनिधी

शिवपुतळो उबारला ती सुवात अपघात प्रवण क्षेत्र

शिवपुतळो मातयेभरवण करतले अशें आदेशांत म्हणूंकच ना

म्हापशें: कळंगूटे अश्वारुढ शिवाजी महाराजांचो पुतळो कुशीक काडपा संबंदी पंचायतीन शिवस्वराज्य कळंगूट हे संस्थेक सुचोवणीपत्र केल्लें. हातूंत शिवपुतळो मातयेभरवण करतले वा मोडून उडयतले अशें म्हणूंक नाशिल्लें. पूण कांय लोकांनी आनी प्रसारमाध्यमांनी दिशाभूल करपी खबर पातळावन शिवमोगींक खुबळायिल्ल्यानूच गांवांत कायदो आनी सुवेवस्थेचो प्रस्न उप्रासलो. ज्या जंक्शनाचेर हो शिवपुतळो उबो आसा, ती सुवात अपघात प्रवण क्षेत्र आसा. तेच खातीर आमी छत्रपतींच्या पुतळ्याक अनुकूल नाशिल्ले आनी पयलींच्या पुतळ्याक फर्मागुडी भशेन भव्य रुप स्वरूप दिवपाची कल्पना आमी संघटणे मुखार मांडिल्ली अशें स्पश्टीकरण कळंगूटचे सरपंच जोजफ सिक्वेरान दिलें.

शुक्रारा पंचायत कचेरेंत आयोजीत पत्रकार परिशदेंत सरपंच सिक्वेरा हांणी शिवपुतळ्या वयल्यान सुरू आशिल्ल्या वादाचेर आपली आनी कळंगूट पंचायत मंडळाची बाजू मांडली.

फाटल्या मंगळारा 20 जून दिसा पंचायत कचेरे भायर जमिल्ल्या शिवमोगींक म्हाका दोश दिवपाचो ना. कारण तांकां प्रसाद शिरोडकार, सुदेश मयेंकार, ज्ञानेश्वर मठकार आनी अमीत पुजारी हांणी दिशाभूल केली. तांणी जमावाक खुबळायिल्ल्यान शिवमोगींनी पंचायत कचेरे सयत वाहनांचें लुकसाण केलें आनी पुलिसांचेरूय फातर शेंवटिले असो दावो सिक्वेरान केलो.

फाटलीं 30 वर्सां हांव पंचायतीच्या सरपंचपदार आशिल्लों. पूण केन्नाच आपणे खंयच्याच धर्मांत भेदभाव केलो ना. पूण कांय जाणांनी हेतुपुरस्सर स्वताच्या राजकारणा खातीर शिवपुतळ्याचो हो मुद्दो हिंदू-क्रिस्तांव करून गांवांत वाद निर्माण करपाचो यत्न केला असो आरोप सिक्वेरान केलो.

जे सुवातेर शिवपुतळो उबारला, ती सुवात अपघात प्रवण क्षेत्र आसा. जंक्शना वयल्यान विवीध दिशेन पांच रस्ते वतात. हाचे पयलीं रस्त्याचे कुशीक शिवरायांचो ल्हान पुतळो आशिल्लो. थंयच फर्मागुडी भशेन किल्लो उबारून ह्या थळाचें सोबितीकरण करुया अशें हांवें संबंदीत शिवमोगींक सुचयिल्लें. पूण तांणी तो प्रस्ताव मान्य केलो ना, आनी भायले भायर 3 जूनाक रातयांत स वरां भितर हो अश्वारुढ शिवपुतळो उबारलो. ह्या वेळार हांवें पुलीस निरिक्षकाक मध्यान रातींच फोन करून हो बेकायदो प्रकार आडावपाची सुचोवणी केल्ली, पूण पुलिसांनी कारवाय केली ना अशें सिक्वेरान म्हणलें.

छत्रपती शिवाजी महाराज कोण आशिल्ले, हाची म्हाका पुरेपूर जाण आसा. शाळेंत हांव छत्रपतींचो अभ्यास केला. मराठी विशयांत आमकां छत्रपतींचे धडे आशिल्ले. हांवें फ्रॅन्च विशय घेवंक नाशिल्लो. आपूण शिवाजी महाराज वा शिवमोगींच्या विरोधांत ना. हांवूय शिवमोगीच आसा. हें जंक्शन अपघात प्रवण क्षेत्र आशिल्ल्यान थंय पंचायतीक हायमास्ट दिवो उबारपाचो आशिल्लो. आमी शिवाजी महाराज वा शिवपुतळ्याच्या विरोधांत ना अशें सिक्वेरान म्हणलें.

जोजफ सिक्वेरा हो व्हिलन वा सालाझार आसा अशें कांय जाणां कडल्यान समाजांत हेतुपुरस्सर बिंबोवपाचो यत्न जायत आसा. शिवाजी महाराजांचो पुतळो कुशीक काडपाचो थाराव हांवें एकल्यान घेवंक नाशिल्लो. पंचायत मंडळाचे बसकेंत सगल्यांचे संमतीन थाराव मंजूर जाल्लो. पूण उपरांत दोगां पंच वांगड्यांनी भुमिका बदल्ली आनी ते मोर्चांत वांटेकार जाले. अशें सिक्वेरान म्हणलें.

नायकवाडो जंक्शनार जंय शिवाजी महाराजांचो पुतळो उबारला, थंय हायमास्ट दिवो उबारपाचो निर्णय कळंगूट पंचायत मंडळान घेतिल्लो. ते प्रमाण काम सुरू जावपाचें आशिल्लें. पूण मुख्यमंत्र्यांनी फोन करून हें काम हातांत घेवं नाका अशी सुचोवणी म्हाका केली. कारण ते सांखळी नगरपालिका वेंचणुके निमतान प्रचारांत व्यस्त आशिल्ले. वेंचणुके उपरांत हो विशय पळोवया अशें मुख्यमंत्री म्हजे कडेन उलयिल्ले. उपरांत हो फुडलो वादग्रस्त प्रकार हे सुवातेर घडलो अशें सरपंच जोजफ सिक्वेरान म्हणलें.