विंडीजाची आस्त कायम

भांगरभूंय | प्रतिनिधी

झिम्बाब्वेन वॅस्ट इंडिजाक 153 धांवड्यांचेर आडायल्या उपरांत दोन खेपेचो संवसारीक टी-20 वस्ताद वॅस्ट इंडीजाच्या पंगडाचें आव्हान पात्रताय फेरयेंतूंच सोंपता काय कितें अशी स्थिती निर्माण जाल्ली. पूण, विंडीजाच्या बॉलरांनी आपल्या बॅट्समांचें अपेस धांपून दवरीत जबरदस्त पुनरागमन केलें. तांणी झिम्बाब्वेचो डाव 122 धांवड्यांचेर सोंपोवन 31 धांवड्यांनी जैत जोडलें. पात्रताय फेरयेंतलें ताचें हें पयलें जैत थारलें. ह्या जैतान संवसारीक टी-20 सर्तीचे पात्रताय फेरयेंतल्यान भायर पडपाचें टाळ्ळें.

विंडीजा वतीन अल्झारी जोसेफान चार ओव्हरींनी 16 धांवड्यो दिवन 4 विकेटी घेतल्यो. जाल्यार अणभवी होल्डरान 12 धांवड्यांनी तीन विकेटी मेळयल्यो. ते पयलीं विंडीजा वतीन जॉन्सनल चार्ल्सान 36 बॉलांनी 45 धांवड्यो केल्यो. जाल्यार रोव्हमन पॉवेलान 21 बॉलांनी आक्रमक 28 धांवड्यो करून पंगडाक 153 धांवड्यां मेरेन पावोवपाक मजत केली.

वॅस्ट इंडीजाक 153 धांवड्यां मेरेन आडायल्या उपरांत झिम्बाब्वेन आपल्या डावाची आक्रमक सुरवात केली. दोन ओव्हरींनी 29 धांवड्यां मेरेन मजल मारून झिम्बाब्वेन विंडीजाचें टॅन्शन बरेंच वाडयिल्लें. पूण, अल्झारी जोसेफान मुखेली रेगीस चकाब्वाल हाका 13 धांवड्यांचेर बाद केलो. ते उपरांत जोसेफान टोनी मुनयोंगाक 2 धांवड्यांचेर बाद करून झिम्बाब्वेक दुसरो धपको दिलो. मॅकॉयान विलियम्साक 1 धांवडेचेर बाद करून झिम्बाब्वेक बॅकफुटाचेर धुकल्ली. मजगतीं, होल्डरान 19 बॉलांनी 27 धांवड्यो करपी विजली मॅथवेराची विकेट घेवन झिम्बाब्वेक मोठो धपको दिलो.

58 धांवड्यांचेर 4 बॅट्समन बाद जाल्या उपरांत झिम्बाब्वेची सगली भिस्त अणभवी सिकंदर रझाचेर आशिल्ली. पूण, ओडेन स्मिथान ताका 14 धांवड्यांचेर बाद करीत ताका तंबूंत धाडलो.

ते उपरांत विंडीजान मॅची वयली आपली पकड घटमूट करीत झिम्बाब्वेची अवस्था 15.3 ओव्हरींनी 8 बाद 102 अशी केली. पूण, सकयले सुवाते वयलो बॅट्समन ल्युक जॉंगवेन 22 बॉलांनी 29 धांवड्यांची आक्रमक खेळी करीत खर प्रतिकार करपाक सुरवात केली. पूण, अल्झारी जोसेफान ताका बोल्ड करून ताचो खर प्रतिकार मोडून काडलो. जोसेफची मॅचींतली ही चवथी विकेट आशिल्ली. अखेरेक होल्डरान चताराक तीन धांवड्यांचेर बोल्ड करून विंडीजाचें जैत निश्चीत केलें.