राय उपसरपंचा आड दाखल केल्लो अविश्वास थाराव संमत

भांगरभूंय | प्रतिनिधी

मडगांवः राय पंचायतींत राजकारणाक लागून हाचे आदीं आरोप – प्रत्यारोप जाल्ले. राय पंचायतीच्या स वांगड्यांनी उपसरपंच गॉडफ्री ओसवर्ड सुझा हांचे आड अविस्वास थाराव मांडिल्लो. सोमारा वेंचणुके जाले उपरांत हो थाराव 6 आड 5 मतांनी संमत जालो.
कांय दिसां आदीं राय पंचायतीच्या उदरगतीच्या कामां संबंदी सरपंचांनी सचीवांचेर केल्ले आरोप सचीवांनी न्हयकारिल्ले. ते उपरांत कांय पंचानी पत्रकार परिशद घेतली आनी राय पंचायतींत सत्ताधारी पक्षान चुकीच्या कागदपत्रांच्या आदारान कामां दिल्ल्यान ऑडिट सयत उदरगत कामां खातीर निधी मेळपाक समस्या निर्माण जातली अशें सांगिल्लें. राय उपसरपंच गॉडफ्री ओसवर्ड सुझा हांचे आड अविस्वास थाराव दाखल जाल्लो आनी तो संमत जालो.
आंतानिओ झेविअर फर्नांडिस, मान्यूएल रॉड्रिग्ज, पीटर क्वाद्रोस, जुडास क्वाद्रोस, मिंगुलिना डिसोझा, क्विनी डिकॉस्टा ह्या स पंच वांगड्यांनी सय केल्लें पत्र गट उदरगत अधिकाऱ्यांक सादर केलें. उपसरपंच पंच वांगड्यांक सहकार्य करीना आनी निर्णय घेतना पंचांक विस्वासांत घेना असो दावो केल्लो. सोमारा बीडीओ कार्यालयान नेमिल्ल्या वेंचणूक अधिकाऱ्यांनी मतदान प्रक्रिया घेतली. हे वेंचणुकेंत पंच वांगडी आंतानिओ झेविअर फर्नांडिस, मान्यूएल रॉड्रिग्ज, पीटर क्वाद्रोस, जुडास क्वाद्रोस, मिंगुलिना डिसोझा, क्विनी डिकॉस्टा हांचेनी थारावाच्या फाटबळांत मतदान केलें, जाल्यार सरपंच मारिओ डिसोझा, जेसिंटा डायस, सिंथिया फर्नांडिस, ट्रिफीओन कार्डोज आनी सुझा हांणी ताचे आड मतदान केलें. ते प्रमाण 6 आड 5 मतांच्या अंतरान सुझा आड दाखल केल्लो अविस्वास थाराव संमत जालो.