भांगरभूंय | प्रतिनिधी
राज्य प्रदुशण नियंत्रण मंडळाच्या अहवालांतली म्हायती
पणजी : राज्य प्रदुषण नियंत्रण मंडळान जाहीर केल्ल्या अहवाला प्रमाण राज्यांतल्या 18 मदीं 11 सुवातो वायू प्रदुशणाच्या विळख्यांत सांपडल्यात. ह्या सुवातांचेर ‘पीएम 10’ ह्या घातक प्रदुशण कणांचें प्रमाण मर्यादे परस चड आसा. हवेंतल्या ह्या कणांची वर्सुकीं सरासरी मर्यादा 60 मायक्रोग्रॅम प्रती घनमिटर इतली थारायिल्ली आसा.
अहवाला प्रमाण कुंकळ्ळी उद्देगीक वसणूक क्षेत्रांत ‘पीएम 10’ प्रदुशण कणांचें प्रमाण सगल्यांत चड 72 मायक्रोग्रॅम प्रती घनमिटर आसा. ते उपरांत कुंडय उद्देगीक वसणुकेंत ‘पीएम 10’ चे वर्सुकीं प्रमाण 70 मायक्रोग्रॅम प्रती धनमिटर आसा. जाल्यार राजधानी पणजेंत हेंच प्रमाण 68 मायक्रोग्रॅम प्रती घनमिटर इतलें आसा.
हो अहवाल एप्रील 2022 ते मार्च 2023 ह्या काळांतलो आसा. ह्या काळांत राज्यांतल्या 18 सुवातांनी वायू प्रदुशणाचें मेजमाप केल्लें. हातूंत निवासी आनी वेवसायीक क्षेत्रांतल्या 6, खण क्षेत्रांतल्या 8 जाल्यार उद्देगीक वसणुकेंतल्या 4 सुवातांचो आस्पाव आसा.
हेर वायू प्रदुशण कणांचो विचार केल्यार वास्कोंत ‘पीएम 2.5’ चें प्रमाण 36 जाल्यार पणजेंत 30 मायक्रोग्रॅम प्रती घनमिटर आसा. ‘पीएम 2.5’ ची वर्सुकीं सरासरी मर्यादा 40 मायक्रोग्रॅम प्रती धनमिटर आसता. अशें आसले तरी घातक समजुपी सल्फर डायऑक्साईड (एसओ 2) आनी नायट्रोजन डायऑक्साईडचे (एनओ 2) प्रमाण राज्यांत सगलीं कडेन उणें आसा.
‘पीएम 10’ ची वर्सुकीं सरासरी मर्यादा 60 मायक्रोग्रॅम प्रती घनमिटर परस चड आसपी थळां आनी ‘पीएम 10 चें प्रमाण
कुंकळळी 72
कुंडय 70
पणजी 68
अामोणें 67
एमपीटी 67
अस्नोडें 66
तुयें 66
उसगांव 63
होंडा 62
कोडली 62
सांगें 61
‘पीएम 10’ क लागून भलायकेक धोको
10 मायक्रॉन वा ताचे परस उणो व्यास आसपी प्रदुशण कणांक ‘पीएम 10’ म्हणटात. हातूंत बुरशीं, धातू, धूळ, काजळी, धुंवर हांच्या सूक्ष्म कणांचो आस्पाव आसात. ह्या कणांचें हवेतलें प्रमाण वाडल्यार दोळे, नाक, घसो, तशेंच फुफ्फुसाक त्रास जावपाक शकता. ताका लागून अस्थमा, खोकली, स्वास घेवपाक त्रास जावप अशें गंभीर दुयेंस जावपाची भिरांत आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
