भांगरभूंय | प्रतिनिधी
-सरकार म्हयन्याक फारीक करता 8,02,718 रुपया भाडें
पणजीः म्हापश्यां तीन न्यायालयां जाल्यार पणजे एक न्यायालय भाड्याचें इमारतींत सुरू आसा. ते खातीर सरकार दरेक म्हयन्याक 8,02,718 रुपया भाडें फारीक करता. तशेंच ही चारूय न्यायालयां सुसज्ज (फर्निंशींग) करपाक 6,97,854 रुपया खर्च केल्यात. जाल्यार म्हापशेंचे एक न्यायालय 15 जानेवारी 2004 पसून खाजगी मालमत्तेंत सुरू आशिल्ल्याची म्हायती कायदो मंत्री निलेश काब्राल हांणी विधानसभेंत लेखी जापेंत दिल्या. मडगांवचे आमदार दिगंबर कामत हांणी नकेत्री प्रस्न विचारिल्लो. ताका मंत्री काब्राल हांणी जाप दिल्या. ते प्रमाण म्हापशेंचे हंगामी जिल्हो न्यायाधीश एक आनी सहाय्यक सत्र न्यायाधिशांचे न्यायालय (जलद न्यायालय) गणेश स्मृती इमारतीचे दुसरे माळयेर 15 जानेवारी 2004 पसून सुरू आसा. ते खातीर दरेक म्हयन्याक 1,34,485 रुपया सरकार भाडें फारीक करता. ह्या न्यायालयाच्या फर्निशिंग खातीर 5,48,516 रुपया खर्च केल्यात. म्हापशेंचे जिल्होे न्यायाधीश 1 आनी अतिरिक्त सत्र न्यायालय ‘राज रौनक’ इमारतीचे दुसरे माळयेर 1 मार्च 2013 पसून सुरू आसा. ते खातीर दरेक म्हयन्याक 1,81,101 रुपया सरकार भाडें फारीक करता. ह्या न्यायालयाच्या फर्निशींग खातीर 30,51,121 रुपया खर्च केल्यात. ही तिनूय न्यायालयां मेरशें उबारपी जिल्हो आनी सत्र न्यायालयाचे इमारतींत स्थलांतरीत करतले. संबंदींत इमारत 21 जुलय 2024 दिसा पुराय जावपाची तात्पुरती तारीख गोंय साधन सुविधा उदरगत म्हामंडळान दिल्ल्याची म्हायती कायदो मंत्री नीलेश काब्राल हांणी विधानसभेंत लेखी जापेंत नमूद केल्या.
तशेंच पणजेचे प्रशासकीय लवाद डॉ. वैद्य हॉस्पिटल इमारतीचे दुसरे आनी तिसरे माळयेर 14 जुलय 2005 पसून सुरू आसा. ते खातीर दरेक म्हयन्याक 2,95,000 रुपया सरकार भाडें फारीक करता. ह्या न्यायालयाच्या फर्निंशींग खातीर 9,54,185 रुपया खर्च केल्ल्याची म्हायती कायदो मंत्री काब्राल हांणी विधानसभेंत लेखी जापेंत नमूद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
