भांगरभूंय | प्रतिनिधी
-कायदो खात्या कडल्यान अधिसुचोवणी जारी
पणजी : पावसाळी अधिवेशनांत ‘गोंय विधानसभा वांगडी वेतन, भत्ते आनी पेन्शन कायदो 2004 तले दुरुस्ती संदर्भांत अधिसुचोवणी कायदो खात्यान जारी केल्ल्यान हाचे मुखार विधानसभेच्या आमदारांक भत्ते आनी पेन्शनांत घसघशींत वाड मेळटली.
अधिसुचोवणे प्रमाण, हाचे मुखार गोंय विधानसभेच्या आमदाराक विधानसभा अधिवेशन काळांत दरेक दिसाक चार हजार रुपयांचो भत्तो मेळटलो. हाचे पयलीं तो दर दिसा तीन हजार रुपया आशिल्लो. नवे वाहन खरेदी खातीर आतां 15 लाखां बदला 40 लाख रुपया, घर खरेदी खातीर 30 लाखां बदला 40 लाख रुपया मेळटले. हाचे पयलीं आमदारांक गोंया भायर प्रवास, निवासा खातीर 7,500 रुपया मेळटाले. पूण हाचे मुखार तांकां 12 हजार रुपया मेळटले. तशेंच वैजकी उपचारां खातीर 5 लाखां मेरेनची रक्कम मंजूर जातली. हाचे पयलीं वैजकी उपचारां खातीर आमदारांक तीन लाखां मेरेनची रक्कम मंजूर करपाचो अधिकार सभापतींक आशिल्लो.
मजगतीं, हाचे पयलीं निवृत्ती उपरांत आमदारांक पयल्या वर्सा खातीर दरेक म्हयन्याक 15 हजार रुपया आनी ते उपरांत वांगडीपदाच्या दरेक वर्सा खातीर दर म्हयन्याक दोन हजार रुपया अशें वेतन मेळटाले. हाची कमाल मर्यादा 70 हजार रुपया आशिल्ली. पूण हाचे मुखार आमदारांक पयल्या वर्सा खातीर दर म्हयन्याक 30 हजार रुपया आनी ते उपरांत वांगडीपदाच्या दरेक वर्सा खातीर म्हयन्याक 4 हजार रुपया मेळटले. हाची कमाल मर्यादा 2 लाखां मेरेन आसतली. आमदारांचे भत्ते आनी पेन्शनवाडीक फाटल्या म्हयन्यांत मंत्रीमंडळान मान्यताय दिले उपरांत हें दुरुस्ती विधेयक पावसाळी अधिवेशनांत येवन ताका मंजुरी मेळिल्ली. विरोधांतल्या कांय आमदारांनी हाका विरोध केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
