भांगरभूंय | प्रतिनिधी
भाजपाच्या समन्वय समितींत निर्णय, दिल्लींतल्यान जातली घोशणा
पणजी : भाजपाच्या समन्वय समितीन शेनवारा जाल्ले बसकेंत भाजप प्रदेश पक्षाध्यक्ष सदानंद शेट तानावडे हांचें नांव निश्चीत केलां. राज्यसभे खातीर तानावडे हांचें एकमेव नांव बसकेंत चर्चेक आयलें. आतां तांचें नांव पक्ष श्रेश्ठींच्या मान्यताये खातीर धाडटले. उपरांत दिल्लींतल्यान राज्यसभे खातीर तांच्या नांवाची घोशणा जातली, अशी म्हायती मेळ्ळ्यां.
भाजपा खातीर पक्ष सांगता ते काम करपी सदानंद शेट तानावडे हांची सुरवात पक्षाचो कार्यकर्तो म्हूण जाली. आमदार तशेंच पक्षांतल्या वेगवेगळ्या पदांचेर तांणी केलां. उपरांत ते प्रदेशाध्यक्ष जाले. अातां राज्यसभे खातीर तांचें नांव निश्चीत केलां. डॉ. प्रमोद सावंत मुख्यमंत्री आनी सदानंद शेट तानावडे प्रदेशाध्यक्ष जाले पसून गोंयांत जाल्ल्या सगल्याच वेंचणुकांनी भाजपान जैत मेळयलां.
गोंया सयत गुजरात आनी अस्तंत बंगालांतल्या वट्ट 10 सुवातां वयल्या वांगड्यांचो कार्यकाळ सोंपला. ते खातीर 24 जुलयाक राज्यसभेच्या सुवातां खातीर वेंचणूक घेतले, अशें वेंचणूक अायोगान जाहीर केला.
विनय तेंडुलकारांचो कार्यकाळ 28 जुलयाक सोंपता
गोंयांतले सध्याचे राज्यसभा खासदार विनय तेंडुलकार हांचो कार्यकाळ 28 जुलयाक सोंपता. गाेंयांत एकूच राज्यसभेची सुवात आसा. भाजपा कडेन गोंयांत विधानसभेच्यो सगल्यांत चड सुवातो आशिल्ल्यान ही सुवात परतून भाजपा कडेनूच वतली. तानावडे हांच्या नांवार पक्ष श्रेश्टींनी म्होर लायल्यार गोंयांतल्यान भाजपाचो सेगीत दुसरो राज्यसभेचो खासदार आसतलो. हाचे पयलीं ही सुवात भोवतेक खेपे काँग्रेसीक मेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
