भांगरभूंय | प्रतिनिधी
आयज रगतदान दीस. हें सगल्यांत पवित्रदान म्हणटात. ते निमतान विशेश…
संवसार 14 जून दिसा संवसारीक रगतदात्यांचो दीस मनयता. जे हेरांक जिणेची दुसरी संद दिवपाक फुडें येतात, अशा रगत दिवपी लाखांनी स्वयंसेवी, फुकट रगतदात्यांक आज संवसारीक नमन. संवसारीक रगतदाता दिस 2025 चो विशय- “रगत दिया, आशा दिया” हो रगत दान दिवपाच्या कृतीचो कोणाच्याय जिविताचेर कितलो बळिश्ट परिणाम जावंक शकता हाचेर भर दिता.
रगत हें फकत शारिरीक पदार्थ न्हय, तें काळजी, एकचार आनी बरे जावपाचें प्रतीक. अंदूंच्या विशयांत दरेक रक्तदान हें जिवाक धोको निर्माण करपी, शस्त्रक्रिया करपी वा दीर्घकालीन दुयेंसां कडेन झुजपी दुयेंतींक कशी आशा दिता हाचेर भर दिता. दान केल्ल्या रगताच्या दर एका युनिटा फाटल्यान करुणेचो संदेश आनी परतून जियेवपाची, बरे करपाची आनी आशा दिवपाची संद आसा हाची काळजा थावन याद करून दिवपी.
दिसाचो इतिहास
संवसारीक भलायकी संघटनेन (संभसं) 2004 वर्सा आंतरराश्ट्रीय रॅड क्रॉस आनी रॅड क्रिसेंट सोसायटी, आंतरराश्ट्रीय रगत संक्रमण सोसायटी आनी आंतरराश्ट्रीय रगतदाता संघटना हांच्या जोड पालवान संवसारीक रगतदाता दीस स्थापन केलो. एबीओ रगत गट प्रणालीचो सोद घेवपी नोबेल पुरस्कार विजेते शास्त्रज्ञ कार्ल लॅंडस्टाइनर हांच्या वाडदिसाच्या निमतान ही तारीख 14 जून वेंचून काडली.
सुरवाती सावन संवसारीक रगतदातांचो दीस हो संवसारीक भलायकेची एक मुखेल कार्यावळ जाला, जो 190 परस चड देशांनी मनयतात. दर वर्सा वेगवेगळ्या देशांनी अधिकृत कार्यावळी घडोवन हाडटात आनी हो दीस जागृताय मोहीम, रगतदान मोहीम आनी रगतदात्यांक मान्यताय आधी भोमान सुवाळ्यांनी मनयतात. तांची उदारताय जिवीत वाचयता, समाजांक घटमूट करता आनी एकचाराची भावना मुखार हाडटा. हो दीस उपकार मानपाचो दीस, पूण हाचेच वांगडा सुरक्षीत, नेमान रगतदान करपाची गरज, कांत वेळार तात्काळ गरज, अशा जागृतायेचोय हो दीस.
तुमी दिवपी रगताच्या दर एका थेंब्यावांगडा दिवपी आशा आनी जागोवपी विश्वास हांकां हो मान. संवसारभर दर वर्सा लाखांनी दुयेंती रगत घालपाचेर आदारून आशिल्ल्यान दरेक दान आशा निर्माण करता.
हे मोहिमेचे उद्दिश्ट
रगत आनी प्लाझ्मा दानाची गंभीर गरज आनी ताचो दुयेंतीच्या जिविताचेर जावपी परिणामा विशीं जागृताय करप; नव्या आनी चालंत दात्यांक नेमान रगतदान करपाक प्रोत्साहन दिवप, जें स्थिर आनी फावो ती रगत पुरवण सुनिश्चीत करपाक मदत करता; रगतदात्यांचो हेरांच्या भलायकेचेर आनी बरेपणाचेर जावपी सकारात्मक परिणाम उजवाडावप आनी रगतदानांतल्यान एकचार, करुणा आनी समाज हांचीं मुल्यां वाडोवप; आनी संवसारभर सुरक्षीत रगत उपलब्धतायेची आनी रगत सार्वत्रिकपणान सुलभतायेन मेळोवपाची तजवीज करप. ताचेपासत राष्ट्रीय रगत कार्यावळींत गुंतवणूक करपाक आनी तिगोवन दवरपाक सरकारां आनी उदरगत भागीदारांकडल्यान आदार मेळोवप.
गोंयांतय सातत्त्यान रंगतदार करपी समाजीक भावनेचे लोक आसात. जाय ते क्लब, आपवावुरपी संस्था, बिगर सरकारी संघटना हो वावर करतात. आयच्या समाज माध्यमांच्या जगांत जायते रगताची उपलब्धताय मार्गदर्शक ग्रूप लोकांक आकांताक पावतात. असल्या निसुवार्थी लोकांक आयज नमन फावो जाता.
कांत दुयेंसां, दुयेंती आधी दिव्यांग हांकां रगताची कायम गरज आसता. हातूंत थॅलेसीमिया दुयेंती खातीर रगतदान म्हत्वाचें आसता थालसेमिया हो हिमोग्लोबीनाचेर परिणाम करपी आनुवंशिक विकार. ताचीं भुरगीं जावं तरनाटे हिमोग्लोबिन उणावाक लागून खर अशक्तताय भोगतात. थॅलेसीमिया मेजर आशिल्ल्यांक दुशित तांबड्या रगतपेशींचे सुवातेर दर 2- 4 सप्तकांनी रगत घालचें पडटा. तांकां अवयवांचे लुकसाण जावचें न्हय आनी जिणेचो दर्जो सुदारपा खातीर पुरायपणान दान केल्ल्या रगताचेर आदारून रावचें पडटा. गोंयांत थॅलेसेमियाचे सुमार 90 दिव्यांग आसात. तांकां गोंय वैजकी महाविद्यालय हाॅस्पिटलांतल्यान रगत दितात.
दान केल्ल्या रगताची सातत्त्यान पुरवण केल्यार वेळार रगत घालपाची खात्री जाता. कारण उणावाक लागून भलायकेचे परिणाम वायट जावंक शकतात. कांय वेळार दुयेंती दगावता लेगीत.
सुसंगत रगत प्रकार आनी ताजें रगतदान म्हत्वाचें आसता, जें चालंत काळजी घेवपाक आनी रगतांतल्या लोह नियंत्रण सारकिल्या गुंतागुंतांचें वेवस्थापन करपाक मदत करता. थॅलेसीमिया घटका खातीर जिवीत रेखा तिगोवन दवरपा खातीर नेमान रगतदान करप गरजेचें. समाजांत जात-धर्माच्या नावान धोशी घालप्यांनी वा तांचे चिथावणेक बळी पडप्यांनी मतींत घेवंक फावो :
रगत सगळ्यांचें एक.. सर्वसमावेशी. ना दिवप्याचो जात-धर्म थंय पळेतात ना घेतल्याचो! आयज सगळ्या रगतदात्यांक आमचें काळजा सावन वंदन!
– प्रकाश कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
