‘योग पिता’ परमहंस योगानंद

भांगरभूंय | प्रतिनिधी

पणजे 21 वेर खाशेली कार्यावळ

एकवीस जून हो दीस ‘संवसारीक योग दीस’ म्हणून मनयतात. आयज योगविद्येक जी मान्यताय मेळ्ळ्या ती मेळचे आदीं पाश्चात्य देशांनी ‘योग पिता’ म्हणून जांकां वळखतात त्या परमहंस योगानंद हांणी संवसारभर योगाचो प्रसार केलो.
परमहंस योगानंद हांचो जल्म 1893 वर्सा भारतांत जालो. 1917 वर्सा तांणी क्रिया योगाचो प्रसार करपाक भारतांत योगोदा सत्संग सोसायटीची स्थापना केली. 1920 वर्सा तांणी अमेरिकेंत Self realisation fellowship (SRF) ची स्थापना केली. 1946 वर्सा तांचें ‘योगी कथामृत’ हें पुस्तक उजवाडा आयलें. ह्या पुस्तकाचो अणकार संवसारांतल्या 50 भाशांनी जाला आनी आतां मेरेन ताच्यो 50 लाख प्रती खपल्यात. ह्या शेंकड्यांतल्या 100 सर्वोत्तम अध्यात्मीक ग्रंथां भितर ह्या पुस्तकाचो आसपाव जाता.
भगवान श्रीकृष्ण आनी येशू हांचे शिकवणींत आशिल्ली समानताय दाखोवपा खातीर परमहंस योगानंद हांणी Second Coming Of Christ आनी God’s Talk With Arjuna हीं पुस्तकां उजवाडा हाडलीं. 1952 वर्सा अमेरिकेंत आसतना तांणी देह सोडलो. अमेरिकेंत तांचो तीस वर्सां वयर राबितो आशिल्लो.
मजगतीं, कला, विज्ञान, साहित्य, उद्देग आदी मळां वयले लोक तांचे शिश्य जाले. आयुश्यांतलीं चडशीं वर्सां जरी तांणी भारता भायर सारलीं आसलीं तरी भारत सरकारान तांणी केल्ल्या कार्याची दखल घेतली आनी तांचे यादीक 1977 आनी 2017 ह्या वर्सा पोस्टाच्या स्टॅम्पाचें अनावरण केलें.
आयज संवसारभर SRF चे 125 फांटे आनी भारतांत योगोदा सत्संग सोसायटीचे 200 परस चड फांटे आसात आनी ते क्रिया योगाचो प्रसार करतात. भारताच्या इतिहासांत जे जायते संत जावन गेले त्या संतां मदीं परमहंस योगानंद हांकां मानाची सुवात आसा. अश्या ह्या म्हान योगींचे यादीक योगोदा सत्संग सोसायटीन संवसारीक योग दिसा निमतान शेनवारा, 21 जूनाक एक खाशेली कार्यावळ आयोजीत केल्या. Kriya Yoga Meditation ह्या विशयाचेर आदारीत ही संवादात्मक कार्यावळ 21 जून 2025 दिसा सांजवेळा 6 ते 7 मजगतीं पणजेच्या काकुलो माॅला फाटल्यान आशिल्ले कामत ग्रॅड इमारतींतले तिसरे माळये वयल्या 301 क्रमांकाच्या फ्लॅटांत जातली. इत्सुकांनी अदीक म्हायती खातीर 9822581261 / 9960524567 ह्या नंबरांचेर संपर्क सादचो, अशें आवाहन आयोजकांनी केलां.
डाॅ. जागृती नाडकर्णी
9423183317