भांगरभूंय | प्रतिनिधी
घराक, झाडाक घात; 1 लाखाचें लुकसाण
म्हापशेंः शेटयेवाडो, म्हापश्यां भौशीक बांय कोसळिल्ल्यान ह्या वाठारांत पियेवपाच्या उदकाची समस्या निर्माण जाल्या. हे घडणुकेंत दुचाकी आनी मोटर पंप बांयंत पडिल्ल्यान सुमार1 लाख रुपयांचें लुकसाण जालें.
ही घडणूक बुधवारा फांतोडेर 5 वरांच्या सुमाराक घडली. मंगळारा सावन सुरू आशिल्ल्या उटंगाराच्या पावसाक लागून बांयचो पुराय कठडो कोसळ्ळो. तशेंच थंय पार्क केल्ली स्प्लेंडर दुचाकी आनी तीन उदकाचे पंपूय बांयंत पडले. हाका लागून 1 लाख रुपया मोलाचें लुकसाण जालें. तशेंच ह्या वाठारांतले लोक ह्याच बांयच्या उदकाचेर निंबून आशिल्ले. बांय कोसळिल्ल्यान लोकांचे उदकाचे हाल जाल्यात.
ह्या बांयच्या शेजरा आशिल्ल्या हन्सीमुणी कुटुंबाच्या घराक आनी चिंचेच्या झाडाक घात निर्माण जाला. म्हापशेंच्या उजो पालोवपी दळाच्या जवानांनी तशेंच थळावे नगरसेवक तारक आरोलकारान घडणूक थळाक भेट दिवन पळोवणी केली. हें घातक झाड मारपा संबंदी जिल्हो आपत्कालीन वेवस्थापन विभागा कडेन संपर्क सादला.
मजगतीं, नास्नोळ्यां पंचायत घरा कुशीक एका घराचेर आनी गिरी वाठारांत वीज वाहिन्या सयत रस्त्यार झाड पडलें. हीं झाडां म्हापशेंच्या उजो पालोवपी दळान कापून कुशीक काडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
