म्हादय अभयारण्य ‘व्याघ्र क्षेत्र’ घोशीत करचें

भांगरभूंय | प्रतिनिधी

– उच्च न्यायालयाचे गोंय सरकाराक निर्देश

पणजी : रानजीव म्हामंडळान गोंयांत ‘टायगर रिझर्व्ह वाठार’ नाकाच अशी भुमिका घेवन 10 दीस जाता थंय आसा, आतां मुंबय उच्च न्यायालयान गोंय सरकाराचे कान तोंपल्यात. आयज उच्च न्यायालयान फुडल्या तीन म्हयन्यां भितर म्हादय अभयारण्य आनी सरभोंवतणचो वाठार हो ‘टायगर रिझर्व्ह वाठार’ म्हूण घोशीत करपाचे निर्देश दिल्यात, अशी म्हायती अ‍ॅड. नॉर्मा आल्वारीस हांणी दिली.

मजगतीं, आमकां अजून न्यायालयाच्या आदेशाची काॅपी मेळूंक ना, पूण आमी उच्च न्यायालयाच्या ह्या निर्णयाक सर्वोच्च न्यायालयांत आव्हान दितले, अशें रानमंत्री विश्वजीत राणे हांणी स्पश्ट केलां.

गोंय फावंडेशनान उच्च न्यायालयांत, म्हादय अभयारण्य आनी सरभोंवतणचो वाठार ‘टायगर रिझर्व्ह’ म्हणून अधिसुचीत करचे खातीर एक याचिका दाखल केल्ली. हाचेर उच्च न्यायालयान सोमारा निवाडो दिला, अशें अ‍ॅड. आल्वारीस हांणी सांगलें.

फुडल्या तीन म्हयन्यां भितर म्हादय अभयारण्य आनी सरभोंवतणो वाठार ‘टायगर रिझर्व्ह’ म्हूण अधिसुचीत करचो. तशेंच वागांचे सुरक्षितताये खातीर आराखडो तयार करचो. प्राधिकरणानूय हाका रोखडीच मान्यताय दिवची, अशे निर्देश उच्च न्यायालयान सरकाराक दिल्या.

राज्य सरकारान फुडल्या तीन म्हयन्यांत म्हादय अभयारण्य क्षेत्र आनी सरभोंवतणचो वाठार व्याघ्र क्षेत्र म्हूण अधिसुचीत करचो. तशेंच वागांचे सुरक्षे खातीर आराखडो तयार करचो. तो निश्चीत कालमर्यांदेंत केंद्रीय व्याघ्र संरक्षण प्राधिकरणाक मंजुरी खातीर धाडून दिवचो. ते उपरांत प्राधिकरणानूय बेगिनांत बेगीन ताका मान्यताय दिवची​, अशें निर्देश उच्च न्यायालयान दिल्यात.

2014 त गोंयांत 5 पटेरी वाग आशिल्ल्याचे स्पश्ट जाल्ले. तातूंतल्या चार वागांक 2020 त विख घालून मारिल्लें. ते उपरांत फावंडेशनान ही याचिका दाखल केल्ली. ताचेर इतिहासीक निर्णय आयला, अशें अॅड. आल्वारीस हांणी म्हणलें.

मजगतीं, रान संरक्षण कायद्या खाला म्हादय अभयारण्य ‘व्याघ्र क्षेत्र’ अधिसुचीत करपाचो आदेश उच्च न्यायालयान दिला. ताका निश्चीत कालमर्यादा आसा, हे अजून समजूंक ना. आदेश हातांत आयले उपरांतूच हे विशीं कळयतले, अशें अॅडव्होकेट जनरल देविदास पांगम हांणी म्हणलें.