भांगरभूंय | प्रतिनिधी
भांगरभूंय । प्रतिनिधी
फोंडेंः भारताक हिंदू राष्ट्र म्हणून घोशीत करपाची मागणी करून रामनाथी हांगा रामनाथ देवस्थानांत आयोजीत केल्ल्या सात दिसांच्या वैश्वीक हिंदू राष्ट्र महोत्सवाचो समारोप जालो. ह्या महोत्सवांत देश तशेंच विदेशांतले मेळून 800 परस चड संत, धर्मनिश्ठ, वकील, विचारवंत तशेंच 350 परस चड हिंदू संघटनाचे प्रतिनिधी वांटेकार जाल्ले. ‘हिंदु राष्ट्र से हिंदु विश्व तक’ हे ह्या महोत्सवाचें घोशवाक्य आशिल्लें.
भारतीय संविधानांतले धर्मनिरपेक्ष आनी समतावादी (सेक्युलर आनी सोशलिस्ट) हे शब्द काडून ते सुवातेर आधात्मीक (स्पिरिच्युअल) हो शब्द घालपाची मागणी ह्या महोत्सवांत केल्या. महोत्सवांत हिंदूंचेर जावपी हल्ल्यांच्या विरोधांत चर्चा केली. ते आडावपा खातीर वैचारिक, वैधानीक पांवड्यार कसले यत्न करपाचे हाची दिका निश्चीत केली. हिंदुत्वनिश्ठांचे धर्मबंधुत्वाच्या नात्यान जाल्लें संघटन, हिंदू राष्ट्र वावराक उपासनेचें अधिश्ठान दिवपाचो केल्लो निर्धार तशेंच धर्म वावराक नेट दिवपाचो महोत्सवांत वांटेकार जाल्ल्यांनी केल्लो संकल्प हे ह्या महोत्सवाचें खाशेलेपण आशिल्लें. हिंदू राष्ट्राचो विचार घरघरांत, मनमनांत पावोवपाचो निर्धार महोत्सवांत हिंदूराष्ट्र समर्थकांनी केलो.
महोत्सवांत जाल्ल्या वेगवेगळ्या सत्रांत हिंदू लोक आनी सरकार हाचे मदीं समन्वय घडोवन हाडपा खातीर गांव तें राष्ट्रीय पांवड्या मेरेन हिंदू राष्ट्र समन्वय समितीची स्थापन करपाचें निश्चीत केले. लव्ह जिहाद आनी हलाल जिहाद हाच्या विरोधांत वर्स भरयां जाग्रुती उपक्रम चालीक लावप, मंदिर संस्कृतीचे पुनरुज्जीवना खातीर एक हजार देवळांत वस्त्रसंहिता लागू करपा खातीर समान कृती कार्यावळ चालीक लावपाचें थारायलां.
पुराय देशांत गोहत्या बंदी आनी धर्मांतरण विरोधी कायदे लागू करप, वक्फ आनी प्रार्थना थळ कायदे रद्द करपाची मागणी महोत्सवांत केल्या. हिंदू राष्ट्रा खातीर चालीक लायिल्ल्या उपक्रमांक नेट दिवप, 2025 मेरेन हिंदू राष्ट्राची स्थापना जातलीच ते खातीर तन मन धनान समर्पितपणान काम करपाचो संदेश ह्या महोत्सवात हिंदू लोंकाक दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
