भांगरभूंय | प्रतिनिधी
बांगलादेशा कडल्यान 3-0 अशा फरकान हारपी वॅस्ट इंडिजान भारताक खर आव्हान दिलें. रोमारियो शेफर्डान अखेरच्या बॉला मेरेन संघर्श केलो. बॉलींग आनी बॅटींग ह्या दोनूय विभागांनी वॅस्ट इंडिजान जबरदस्त प्रदर्शन केलें.
शिखर धवन, शुभमन गिल आनी श्रेयश अय्यर हांच्या वैयक्तीक अर्द शेंकड्याचे खेळी उपरांत भारत 400च्या लागसार मजल मारतलो अशें दिशिल्लें. पूण, अखेरच्या 15 ओव्हरींनी विंडिजाच्या बॉलरांनी बरे तरेन पुनरागमन केलें.
बॅटिंगेंत लेगीत 16 धांवड्यांचेर पयली विकेट पडल्या उपरांत कायले मेयर्स आनी ब्रुक्स हाणें शेंकड्याची भागिदारी करून विंडिजाची बरी बुन्याद घालून दिली. पूण, शार्दुल ठाकूरान दोगांकूय फाटोफाट बाद करून भारताक मॅचीं हाडलो. ते उपरांत युजवेंद्र चहलान धपके दीत भारताचें जैत निश्चीत केलें. भारतान ही मॅच जिखून तीन मॅचींचे माळेंत 1-0 अशी आघाडी घेतली.
ते पयलीं भारतान 35 ओव्हरी मेरेन 2 बाद 225 धांवड्यो केल्ल्यो. पूण, फुडल्या 15 ओव्हरींनी 83 धांवड्यां भितर पांच विकेटी वगडायल्यो.
शुभमन गिल (64) आनी शिखर धवन हांची 119 धांवड्यांची भागिदारी 18वे ओव्हरींत फुटली. श्रेयश 57 बॉलांनी 5 चवके आनी दोन सक्यांचे मजतीन 54 धांवड्यो करून बाद जालो.
सुर्यकुमार यादव (13), संजू सॅमसन (12) रोखडेच बाद जाले. अल्झारी जोसेफान 49वे ओव्हरींत अक्षर पटेल (21) आनी दीपक हुड्डा (27) हांकां बोल्ड केले. अशे तरेन भारतान निर्धारीत 50 ओव्हरींनी 7 विकेटी वगडावन 308 धांवड्यो केल्यो.
धांवड्यांचो फाटलाव करपी विंडिजाची सुरवात बरी जाली ना. मोहम्मद सिराजान पांचवे ओव्हरींत शाई होपाक (7) बाद केलो. विंडिजाक 16 धांवड्यांचेर पयलो धपको बसलो. पूण, उपरांत मेयर्स आनी ब्रुक्स हांणी डाव सांबाळटना दुसरे विकेटी खातीर शेंकड्याची भागिदारी केली. मेयर्सान आकर्शक अर्द शेंकडो मारलो. ताणें शार्दुलाची बॉलींग फोडून काडली. अणभवी बॉलरांची गैरहाजेरी ह्या वेळार खरपणान जाणावली. शार्दुला आड सहज धांवड्यो येता आसतना मुखेली धवनान ताका कायम बॉलींग दिली आनी ताचो हो निर्णय येसस्वी थारलो. शार्दुलान 117 धांवड्यांची भागिदारी फोडली. ताणें ब्रुक्साक (46) बाद केलो. विंडिजाक 133 धांवड्यांचेर दुसरो धपको बसलो.
शार्दुलान आपले फुडले ओव्हरींत मेयर्साक बाद करून विंडिजाक खर धपको दिलो. ताणें 68 बॉलांनी 10 चवके आनी एक सक्याचे मजतीन 75 धांवड्यो केल्यो.
मुखेली निकोलस पुरन आनी ब्रॅण्डन किंग्स हांणी सुरवातीक सादूरतायेन बॅटींग करून खेळपट्टीचेर जम बसोवपाचो यत्न केलो. पूण, गरजेची नेट रन रेट वाडपाक लागिल्ल्यान पुरनान पुरनान आक्रमक बॅटींग केली. ताणें प्रसिद्ध कृष्णाक दोन आकर्शक सके मारले. आक्रमक बॅटींग करून लेगीत विंडिजाक गरजेची रन रेट आठच्या लागसार आशिल्ली. निमाण्या 15 ओव्हरींनी ताका जैता खातीर 120 धांवड्यांची गरज आशिल्ली. त्या वेळार मोहम्मद सिराजान पुरनाक (25) बाद केलो. रोव्हमन पॉवेलाक (6) युजवेंद्र चहलान तंबूंत धाडलो.
भारताच्या फिल्डरांनी उत्कृश्ठ बचाव करून विंडिजाक एकेक धांवडे खातीर संघर्श करपाक लायलो. विंडिजाक 60 बॉलांनी 90 धांवड्यांची गरज आशिल्ली. ब्रॅण्डन किंगान 60 बॉलांनी अर्द शेंकडो मारून विंडिजाची आस्त कायम राखली. चहलान घाल्ले 43वे ओव्हरींत किंगान 13 धांवड्यो केल्यो.
किंगान अकील होसैना वांगडा मेळून अर्द शेंकड्याची भागिदारी केली.
विंडिजाक अखेरच्या 6 ओव्हरींनी 10चे सरासरीन धांवड्यो करपाची गरज आशिल्ली. चहलच्या बॉलाचेर सको मारपाच्या यत्नांत किंग (54) बाद जालो. ही विकेट पडल्या उपरांत विंडिजाचें संकश्ट वाडलें. चहलान 58 धांवड्यो दीत 2 विकेटी घेतल्यो.
12 बॉलांनी 27 धांवड्यो जाय आशिल्ल्यो. मॅच सामकी उमळशीक वाडोवपी स्थितींत पावली. शार्दुल आनी प्रसिद्ध हांचेर सगली भिस्त आशिल्ली.
प्रसिद्धच्या पयल्या बॉलाचेर शेफर्डान सको मारलो. ते उपरांत प्रसिद्ध हाणें फुडल्या चार बॉलांचेर फक्त दोन धांवड्यो दीत कमबॅक केलें. शेफर्सान अखेरच्या बॉलाचेर चवको मारून 6 बॉलांनी 15 धांवड्यो अशे स्थितींत मॅच हाडली.
सिराजान निमाणे ओव्हरीचो पयलो बॉल मेडन घालो. दुसऱ्या बॉलाचेर एक धांवडी घेतल्या उपरांत स्ट्रायकाचेर आयिल्ल्या शेफर्डान चवको मारलो. दोन धांवड्यो घेत विंडिजान 300चो आंकडो हुपलो. उपरांत सिराजान वायड बॉल घालो. ते उपरांत दोन धांवड्यो आयल्यो. निमाण्या बॉलाचेर विंडिजाक जैता खातीर पांच धांवड्यांची गरज आशिल्ली. पूण, सिरिजान निमाण्या बॉलाचेर फक्त एक धांवडी दीत भारताक तीन धांवड्यांनी जैत मेळोवन दिलें.
रोमारियो शेफर्ड 37 धांवड्यांचेर आनी होसैन 32 धांवड्यांचेर नाबाद उरलो. विंडिजान 6 विकेटी वगडावन 305 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.