बांगलादेशी घुसखोरांची खोलायेन चवकशी करची

भांगरभूंय | प्रतिनिधी

विवीध हिंदुत्ववादी संघटणांची मागणी; घुसखोरांक मायदेशांत धाडपाची सुचोवणी

भांगरभूंय । प्रतिनिधी

दिवचलः सध्या गोंयांतल्या आतंकवाद विरोधी पुलीस पंगडा कडल्यान चालू आशिल्ली बांगलादेशी घुसखोरांचेर करतात ती कारवाय आनीक खर करची. तांची खोलायेन चवकशी करची, अशी मागणी दिवचलेच्या विवीध हिंदुत्ववादी संघटणांच्या पदाधिकाऱ्यांनी पत्रकार परिशदेंत केली.

भारतांत सध्या सुमार 7 कोटी बांगलादेशी घुसखोर आसात, अशी म्हायती सुरक्षा यंत्रणे कडेन आसा. हो विशय गंभीर आसा. सुरक्षा यंत्रणा सक्षम करून त्या घुसखोरांक तांच्या मायदेशांत घाडपाची मोहीम हातांत घेवची. गोंयांत कावल एकठांय करपाचो वेवसाय करपी हे बांगलादेशी आनीक हेर खंयच्याय कृत्यांनी वांटेकार आसात काय कितें, ताची चवकशी करची, अशी मागणी ह्या वेळार हिंदू जनजागृती समितीचे गोविंद चोडणकार हांणी केली.

दिवचलेक सांस्कृतीक दाय आसा. हे भुंयेर असंस्कृत घडणुको घडपाक लागल्यात. भाड्याच्या बिराडाक दवरतना बिगर गोंयकारांची पुराय चवकशी करुनूच तांकां रावपाक दिवचे, असो उलो हिंदू राष्ट्र संघटणेचे सुबोध मोने हांणी मारलो.

पुलीस आपलें काम योग्य पद्दतीन करतात. तांकां आदार दिवपाची गरज आसा. तशेंच पुलिसांनी बिगर गोंयकार आनी दुबावीत लोकांची वळख पटोवपा खातीर विशेश मोहीम हातांत घेवप गरजेचें आसा. तांची वाहनां तपासचीं. तांच्या बिराडाचेर कोण येतात, कोण वतात ताचेरूय लक्ष दवरप गरजेचें आसा, अशें सुबोध मोने हांणी सांगलें. पत्रकार परिशदेक शिवप्रतिश्ठान हिंदुस्थानाचे मंदार गावडे, सिद्धेश सावंत, भारत माता की जयचे शैलेश जाधव, घनश्याम कुंकळकार, रोहन शिरगांवकार, पापुराज मयेंकार, भोलानाथ गाड, बजरंग दलाचे प्रशांत नायक, शिवप्रेमी सांखळकार हाजीर आशिल्ले.

‘घुसखोरांक मजत करपी सरकारां बरखास्त करात’

सध्या गोंयांत तशेंच देशांत बांगलादेशी, रोहिंग्या अफगाणी आनी हेर देशांतल्या लोकांची जावपी घुसखोरी हो गंभीर आनी हुस्क्याचो विशय जाला. पश्चीम बंगालांतल्यान बांगलादेशी घुसखोर  भारतांत प्रवेश करतात. ह्या घुसखोरा संबंदांत शिमे वयलीं राज्यां केंद्र सरकाराक मजत करिनात. अशा राज्यांतलीं सरकारां तत्काळ बरखास्त करून राष्ट्रपती राजवट लावची आनी ही घुसखोरी बंद करची, अशें भारत माता की जयचे मुकुंद कवठणकार हांणी सांगलें.