भांगरभूंय | प्रतिनिधी
वीज मंत्री सुदिन ढवळीकारः कामाची चवकशी करून विधानसभेंत दितलों स्पश्टीकरण
भांगरभूंय । प्रतिनिधी
पणजी : पावसांत दोंगराळ वाठारांत सुरळीत वीज पुरवण जावची म्हूण घातिल्ली बंच केबल यंत्रणा पुराय अपेशी थारल्या. बंच केबल यंत्रणेच्या कामाची चवकशी करून विधानसभेंत स्पश्टीकरण दितलों, अशें वीज मंत्री सुदिन ढवळीकार हांणी सांगलां. वीज खात्याच्यो समस्या आनी पावसांत वीज पुरवण सुरळीत जावपा खातीर वीज मंत्र्यांनी बसका घेतली.
बसके उपरांत पत्रकार परिशदेंत उलयताना वीज मंत्री सुदिन ढवळीकार हांणी ही म्हायती दिली. सत्तरी, सांगें, काणकोण ह्या दोंगराळ वाठारांत पावसांत वीज पुरवण खंडीत जावपाचें प्रमाण चड आसता. पावसांत सुरळीत वीज पुरवण जावची ह्या उद्देशान फाटल्या सरकाराच्या कार्यकाळात बंच केबल घातिल्ले. एका व्हड केबला भितर वायरी घालून खांब्यांचेर हुमकळून तातूंतल्यान वीज पुरवण जाता. बंच केबल यंत्रणेचेर शेकड्यांनी कोटी खर्च जाल्यात. ही यंत्रणा अपेशी थारिल्ल्याचें आतां वीज मंत्र्यांनी सांगलें.
ऑपरेटरां क फोनाचेर उलोपाचे प्रशिक्षण
वीज पुरवण खंडीत जाली काय लोक सबस्टेशनाक वा वीज खात्याच्या कार्यालयांत फोन करतात. सबस्टेशनाचे ऑपरेटर वा कर्मचारी कांय वेळार योग्य तरेन फोनाचेर उलयनात. लोकांची कागाळ आयकून घेवन तांकां प्रतिसाद कसो दिवचो, हे विशींचें प्रशिक्षण जातलें. अधिक्षक अभियंते फोन घेवपी ऑपरेटर वा हेर कर्मचाऱ्यांक प्रशिक्षण दितले.
800 कोटीं च्या कामाच्यो निविदा
भुंयगत वीज केबल घालपा सयत पोरण्यो सरयो बदलप तशेंच नवे ट्रान्सफॉर्मर घालपा खातीर 800 कोटी रुपयांच्या कामांच्यो निविदा जारी जाल्यात. हाततूंतली कांय कामां सुरू जाल्यात. कांय कामांच्यो वर्कऑर्डरी जारी जावपाच्यो आसात. दक्षीण गोंयांतल्यो पोरण्यो वीज सरयो बदलपा खातीर निविदा जारी जाल्या.
साळगांवां 350 कोटींच्या सबस्टेशनाचें काम सुरू आसा. हें सबस्टेशन जाले उपरांत कळंगूट, साळगांव, शिवोली वाठारांतले वीज पुरवणेंत सुदारणा जातली. वेर्ण्यां 50 एमव्हीए ट्रान्सफॉर्मर बसोवपाचो वावर सुरू आसा. 1 जुलयाक ट्रान्सफॉर्मर चार्ज जातलो. पुराय राज्यांत 40 कोटींचीं कामां जाल्यात.
पावसा खातीर लायनमनाक रेनकोट तशेंच हेर साहित्यांचें वांटप जातलें.
जी 20 परिशदे निमतान 70 कोटींचीं कामां
जी 20 परिशदे निमतान पणजी तशेंच हेर वाठारांनी मेळून 70 कोटींचीं कामां जाल्यांत. हातूंत ट्रॉन्सफॉर्मरा सयत फिक्चरांचो आस्पाव आसा.
कर्नाटकांतल्या इबाडाक लागून समस्या
दक्षीण गोंयाक आंबेवाडी (कर्नाटक) सावन येवपी ग्रीडांतल्या वीज पुरवण जाता. वेंचणुकेक लागून कर्नाटकांत गिमांत ग्रीडाची देखभाल जावंक ना. हाका लागून गोंयांत फ्लक्चुएशन्स जाता. कळंगूट, मांद्रें वाठारांत वीज पुरवण सुरळीत जाय नाशिल्ली. खात्याच्या कर्मचाऱ्यांनी यंत्रणेंतलो दोश पयस करून दुरूस्ती केल्या, अशें वीज मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
