भांगरभूंय | प्रतिनिधी
खबरां संस्था
नॉटिंगहॅमः तीन वर्सां आदीं भारतीय बॅटिंगेचो कणो अशें मानताले तो विराट कोहली सध्या ताचे कारकिर्दींतल्या सगल्यांत वाटय टप्प्यांतल्यान वता. सध्या ताचे बॅटींतल्यान रन येनात. आतां ताच्या सामकार आनीक एक आव्हान आसा. भारताच्या टी-20 पंगडांतली सुवात राखून दवोरपा खातीर ताका 160 अधीक अश्या स्ट्रायक रेटान बॅटींग करची पडटली.
भारताचो मुखेल कोच राहुल दव्रीड आनी कॅप्टन रोहीत शर्मा हांणी सध्या खेळाची शैली बदल्ल्या. टीम इंडियान टी-20 क्रिकेटी खातीर आक्रमक रणनिती तयार केल्या. तातूंत आमचे बॅट्समन सुरवेक सावन आक्रमक खेळ करतात. व्हडली न्हय जाल्यार आक्रमक खेळी करपाचेर द्रवीड-रोहीतान लक्ष दिलां. 130 स्ट्रायकांतल्यान 80 धांवड्यो केल्यो तर कांय फरक पडना. आतां 200च्या स्ट्रायक रेटान केल्ल्यो 30 धांवड्यो चड मोलाच्यो थारतात.
भारतीय पंगड आयर्लंड आनी इंग्लड भोंवडेर खेळल्ल्या चार मॅचींनी भारतान बॅटिंगेचें क्रमवारींत पयल्या 6 सुवातांनी 12 बॅट्समनांक खेळोवन पळयलें. तांणी 165च्या स्ट्रायक रेटान आनी 32.47चे सरासरीन धांवड्यो केल्यात. रोहीम शर्मान 162च्या स्ट्रायक रेटान धांवड्यो केल्यात. दीपक हुड्डा 179, संजू सॅमसन 183 आनी सूर्यकुमार यादव 191च्या स्ट्रायक रेटान बॅटींग करता.
विराट सादारण 130 तें 140च्या स्ट्रायक रेटान बॅटींग करता. तांणे कांय वेळार 180 वा 200च्या स्ट्रायक रेट लेगीत राखला. मात सध्या तो ज्या फॉर्मांत आसा तातूंत हें कुस्तार आसा. पोरूं खेळल्ल्या सगल्या टी-20त, आंतरराष्ट्रीय आनी आयपीएल सयत ताचो स्ट्रायक रेट 120 परस कमी आसा. ताचो करियराचो स्ट्रायक रेट 137.54 आसा. द्रवीड- रोहिताच्या नवे शैली प्रमाण आतां विराटाक खेळ करून पंगडांतली आपली सुवात राखून दवोरची पडटली.
ऑस्ट्रेलियेन 98 दिसांनी संवसारीक करंड टी-20 सर्त जातली. ताचे पयलीं भारताक 20 परस चड टी-20 मॅची खेळच्यो पडटल्यो. भारतीय वेवस्थापनाक उण्यात उणे 12 तें 15 मॅची समान संयोजनाचे खेळपाचे आसात. म्हणल्यार फुडल्यो 5 ते 7 मॅची दरेका खेळगड्याक ट्रायला सारके आसतले. तातूंत डो आपल्याक सिद्ध करपाक शकतलो तो पंगडात तिगतोलो ना जाल्यार बाद जातलो. म्हणल्यार विराटाक जाता तितल्या बेगीन फॉर्मांत येवचें पडटलें. ना जाल्यार पंगडांतली सुवात राखून दवोरपाक ताका बरेंच कुस्तार जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
