भांगरभूंय | प्रतिनिधी
राज्य पांवड्या वयले पयले नॅटबॉल वस्तादपण सर्तींत दादल्यांच्या परंपरीक नॅटबॉलांत सांगें पंगडान जाल्यार बायलांच्या गटांत धारबांदोडेंच्या पंगडान वस्तादपण जोडलें. फास्ट-5 नॅटबॉलांत दादल्यांच्या गटांत फोंडें आनी बायलांच्या गटांत धारबांदोडेंच्या पगंडान वस्तादपण जोडलें. सर्त फोंडेंच्या खेळां संकुलांतल्या इन्डोर स्टेडियमांत जाली.
परंपरीक नॅटबॉलांत दादल्यांच्या गटांतले फायनलींत सांगें पंगडान पेडणें पंगडाक 47-42 अशा फरकान हारयलो. आकाश गायकवाड (उत्कृश्ट शुटर), श्रीकांत जाधव (डिफॅण्डर), प्रणव पोमाणे (उत्कृश्ट खेळगडो) हांकां वैयक्तीक इनामां फावो जालीं.
बायलांच्या गटांतले फायनलींत फोंडेंच्या पंगडान तिसवाडी पंगडाक 24-17 असो हारयलो. तिया तारी (उत्कृश्ट शुटर), सनिका वाघ (उत्कृश्ट डिफॅण्डर), स्नेहिता बांदेकार (उत्कृश्ट खेळगडी) हांकां वैयक्तीक इनामां फावो जालीं.
फास्ट 5 नॅटबॉल प्रकारांत दादल्यांच्या गटांतले फायनलींत फोंडें पंगडान धारबांदोडें पंगडाक 26-20 असो हारयलो. सन्मय बांदेकार (उत्कृश्ट शुटर), तुषार पोपाले (उत्कृश्ट डिफॅण्डर), यश नायक (उत्कृश्ट खेळगडो) हांकां वैयक्तीक इनामां फावो जालीं. बायलांच्या गटांत धारबांदोडेंच्या पंगडान तिसवाडी पंगडा आड 28-27 अशा फरकान हारयलो. शरयू जगताप (उत्कृश्ट शुटर), सेजल नेतळकार (उत्कृश्ट डिफॅण्डर) आनी नीतल हळदणकार (उत्कृश्ट खेळगडी) हांकां वैयक्तीक इनामां फावो जालीं.
इनामां भेटवण सुवाळ्याक उत्तर गोंय जिल्हो पंचायत अध्यक्ष सिद्धेश नायक, भारतीय नॅटबॉल म्हासंघाचे उदरगत समितीचे मुखेली हरी ओम कौशिक उपस्थीत आशिल्ले. गोवा नॅटबॉल असोसिएशनाचे अध्यक्ष शुभम नार्वेंकारान येवकाराचें उलोवप केलें, जाल्यार असोसिएशनाचे सचीव प्रतीश नायकान उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
