भांगरभूंय | प्रतिनिधी
मडगांवः वास्को- चिखली चर्चीचे फादर बोलमॅक्स परेरा हांणी छत्रपती शिवाजी महाराजा विशीं आक्षेपार्ह विधान केल्लें. ते उपरांत राज्यभरांतल्या शिवमोगींनी वास्को पुलीस स्टेशनाचेर मोर्चो व्हेल्लो. उपरांत पुलिसां कडल्यान परेरांचेर गुन्यांव नोंद केलो. अटकेची शक्यताय आशिल्ल्यान फा. परेरा हांणी मडगांव जिल्हो न्यायालयांत जामिना खातीर अर्ज दाखल केला.
फा. बोलमॅक्स परेरा हांणी चर्चींत शेर्मांव दितना शिवाजी महाराजा विशीं आक्षेपार्ह विधान केल्लें. तांचो व्हिडियो व्हायरल जाल्लो. ते उपरांत राज्यांतल्या विवीध पुलीस स्टेशनांत तांचे आड गुन्यांव नोंद जाल्यात.
मजगतीं, फा. बोलमॅक्स परेरा हांणी भौशीक रितीन केल्ल्या विधाना विशीं माफी मागल्या. कागाळ केले उपरांत 24 वरां जावन गेले उपरांत कसल्याच प्रकाराची कारवाय पुलीस प्रशासना कडल्यान जावंक नाशिल्ल्यान शिवमोगी आक्रमक जाले. शुक्रारा सांजे 6 वराच्या सुमाराक वास्को पुलीस स्टेशना भायर शिवमोगींनी गर्दी केली. जे मेरेन परेरा हांकां अटक करिनात ते मेरेन हांगाच्यान वच्चे नात, अशें जमावान सांगिल्लें. दक्षीण गोंय पुलीस अधिक्षका सयत वास्को पुलीस निरिक्षका कडल्यान शिवमोगींची समजूत काडपाचो यत्न जालो. पूण कोणूच आयकून घेवपाचे मनस्थितींत नाशिल्ले. उपरांत पुलिसांनी फा. परेरा हांचेर भादंसंच्या कलम 295 आनी 504 खाला गुन्यांव नोंद केला. तशेंच हाचे फुडली कारवाय करतले, अशें आस्वासन दिले उपरांत शिवमोगी थंयच्यान फाटीं सरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
