भांगरभूंय | प्रतिनिधी
पणजी ः गोंय वैजकी म्हाविद्यालय, भलायकी खाते आनी दंत म्हाविद्यालयान संयुक्तपणान सुरू केल्ली मुफत कॅन्सराची तपासणी मोहीम फाल्यां 14 फेब्रुवारीक हळदोणेच्या प्राथमीक भलायकी केंद्रांत जातली. ही तपासणी सकाळीं 9 ते दनपारां 1 मेरेन जातली. फाल्यां सकाळीं 9 वरां पयलीं नांव नोंदणी करचीं असो उलो भलायकी मंत्री विश्वजीत राणे हांणी मारलां.
मुफत कॅन्सराची तपासणी मोहीम जायत्या जाणांक फायद्याची थारता. मोबायल कॅन्सर निदान गाडयेतल्यान नागरिकांची तपासणी करतात. मेळिल्ले म्हायती प्रमाण, 12 सुवातींनी केल्ल्या ह्या मोहिमेक लागून आतां मेरेन 60 जाणांचो जीव वाटावला. जीएमसींच्या कम्युनिटी विभागाचे मुखेली आनी मोहिमेचे नोडल अधिकारी डॉ. जगदीश काकोडकार हांच्या फुडारपणा खाला ही मोहीम चलता.
हे मोहिमेक लागून आतां मेरेन वाळपय, कुडचडें, साखळे, पोरणे गोंय, काणकोण, सांग्यार, दिवचल, पेडणें, शिरोड्यां आदी वाठारांनी मोबायल कॅन्सर निदान गाडयेंतल्यान थळाव्या लोकांची कॅन्सराची मुफत तपासणी केल्या. आतां मेरेन मोहिमे वेळार 2,525 जाणांची मुफत चांचणी जाल्या. तातूंतल्या 13 जाणांक कॅन्सर जाल्लो आनी 47 जाणांक कॅन्सरा पयलींच्या पांवड्यार आशिल्ल्याचें स्पश्ट जालें. सध्या ह्या सगळ्यांचेर हॉस्पिटलांत उपचार चलतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
