भांगरभूंय | प्रतिनिधी
भांगरभूंय । प्रतिनिधी
पेडणेः दर्या देग वाठारांत रातयां 10 उपरांत संगीत पार्ट्यो चालू दवोरल्यार आयोजकांचेर तशेंच संबंदीत वाठारांतल्या पुलीस अधिकाऱ्याचेर खर कारवाय करपाची शिटकावणी मुंबय उच्च न्यायालयाच्या गोंय खंडपिठान दिल्ल्यान पेडणे पुलीस स्टेशनाचो निरीक्षक दत्ताराम राऊत हांणी मोरजी, आश्वे ,मांद्रें, हरमल, केरी- तेरेखोल हांगचे नायक क्लब, रेस्टॉरन्ट आनी हॉटेल वेवसायिकांची बिरेस्ताराक बसका घेवन तांका न्यायालयाच्या आदेशाची म्हायती दिली. न्यायालयीन आदेशाचो अवमान जावचो न्हय हे खातीर तांकां जाय ती सादूरताय बाळगुवपाक तांणी सांगलें.
पेडणे पुलीस स्टेशनांत घेतिल्ले हे बसकेक पेडणेच्या आवाज प्रदूशन नियंत्रण समितीचो वांगडी अॅड प्रसाद शहापूरकार आनी निवृत्ती शिरोडकार हाजीर आशिल्लो.
दर्या देग वाठारांत पर्यटन सिझनांत संगीत पार्ट्यो आयोजीत करून त्यो फातोड जाय मेरेन चालू आसतात. ताका लागून थंयच्या लोकांक त्रास जातात हाची गोंय खंडपिठान दखल घेतल्या. संगीत पार्ट्यो आयोजीत करपाच्या पांच दीस पयलीं पुलीस स्टेशनांत ती आयोजीत करपा खातीर अर्ज करचो पडटलो. राती 10 उपरांत कितेंय करपाक परवानगी मेळची ना अशें राऊत हांणी ह्या वेळार सांगलें. संगीत पार्ट्या वेळार घुवळी वखदांचो वापर जावचो ना हाची खबरदारी घेवपाक तांणी आयोजकांक सांगलां.
संगीत पार्ट्यो आयोजीत करपाक आमचो विरोध ना. मात आवाजाचें प्रदूशण जावचें न्हय हे खातीर जे निर्बंध घालल्यात तांका पाळो दिवचो असो आमचो आग्रो आसा. रातीं 10 मेरेन जावपी पार्ट्यांनी फकत 55 डेसिबल मेरेन संगीताचो आवाज आसपाक जाय. रातीं 10 उपरांत पार्टी चालू दवोरल्यार आमी पुलीस स्टेशनांत कागाळ करतले अशें प्रसाद शहापूरकारान बसकेंत सांगलें. दर्या देग वाठारांत घुंवळी वखदांचो वेव्हार जावचो ना हाजी जतनाय घेवपाक जाय. नायक क्लब आनी रेस्टॉरंटवाले पर्यटकांक आकर्शीत करपा खातीर जे तरेन जायरात करतात तें बंद जावपाक जाय अशें शहापूरकारान ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
