भांगरभूंय | प्रतिनिधी
भुरग्यांक, तरणाट्यांक गुन्यांवकारी कृती, कायदो, परिणामा विशीं खबर आसपाक जाय. नाजाल्यार खंयच्याय खिणाक प्रकरण आंगार शेकपाक शकता. थोडे ‘वयर मेरेन वशिलो आसा’, ह्या विस्वासाचेर घाळ रावतात. तर थोडे ‘गेलो उडत, मात्शें कितें केल्यार कांय जायना’, असो विचार करतात. ‘आपलो इश्ट वायट कामां करता तें खबर नाशिल्लें. हांवें ताका स्कुटरीन व्हरून सोडिल्लो’ अशेंय म्हणटात…. कायदो, परिणाम खबर नासतकच सगलें कितें बिन्धास्त करप जाता आनी मागीर एक दीस सगलेच त्रासांत पडटात. एकलो चूक करता आनी पुलीस स्टेशनार फावटी मारच्यो पडटात, सगल्यांक. तेन्ना कसलीय गजाल करचे पयलीं विचार करपाक जाय. भिडस्त तरणाटे रोखडेच हांयसाक बळी पडटात. थोडे पयश्यांच्या बदल्यांत जाणूनबुजून मुद्दम करतात. हालींच पाकिस्ताना खातीर हेरगिरी करपाच्या आरोपा वयल्यान 11 जाणांक धरल्यात. हातूंत युट्यूबर, सुरक्षा रक्षक आनी एक अॅप डेव्हॅलोपर आसा. सगले 19 ते 32 वर्सां पिराय गटांतले. तांकां वेगळीं वेगळीं हांयसां दाखोवन पाकिस्तानी दुतावासांतलो कर्मचारी एहसान उर रहिम उर्फ दानीश हाणें भारतीय लश्कराची म्हायती घेतल्या, अशें दिसून आयलां. कांय जाणांनी पहेलगाम हल्ल्या उपरांत हेरगिरी केल्या असो आरोप आसा. म्हणटकच हें चडूच गंभीर, संवेदनशील प्रकरण जालें.
झूज वेगळे वेगळे पद्दतीन लढटात. धूर्त पाकिस्तानान ह्या हेरांचो वापर करून आपणाक जाय ती म्हायती मेळयल्या आसतली. हो सगलो झुजाचोच एक प्रकार जालो. हातूंत सोशल मिडियाचो वापर जाला. ज्योती मल्होत्रा ही ह्या हेरां मदीं सगल्यांत गाजता. कारण तिचे फाॅलोव्हर 3.85 लाख इतले आसात. ट्रॅव्हल विथ ज्यो नांवान ती वेगळ्या वेगळ्या शारांतल्या थळांची म्हायती दिता. पुलिसांच्या मतान, संरक्षणा कडेन संबंदीत म्हायती तिका मेळूंक नाशिल्ली. तरीय तिणें दुस्माना कडेन संपर्क दवरप, तांच्या देशांतल्या थळांचे बरे गूण गावप चुकीचें. ताका लागून पाकिस्ताना विशींची सहानुभूती वाडपाक शकता. ती फाटलीं तीन वर्सां तीन फावटी पाकिस्तान आनी चीनाकूय गेल्ल्याचें दिसून आयलां. हे दोनूय देश आमचे दुस्मान. पर्यटक म्हूण थंय वतना कायदेशीर सोपस्कार करचे पडटात. ती व्हिसा, पासपोर्ट बी घेवन थंय गेल्ली काय तिका कोणे व्हेल्ली, तिणें हांगाच्या, थंयच्या कांय थळांचे व्हिडियो स्वता जावन घाल्यात काय कोणे तिका घालपाक लायल्यात, ताचीय चवकशी सध्या चल्ल्या. हातूंत एक व्हिडियो काश्मीराचो आसा. देवेंद्र सिंगान पतियाळा लश्करी तळाचो फोटो घाल्लो. ताणें आयएसआय एजंटाक म्हायती दिल्या, असो दुबाव आसा. अरमान हो लश्करी हालचालींची म्हायती, फोटो दितालो. ताच्या फोनांत पाकिस्तानी नंबर मेळ्ळ्यात. तारीफ हो तरणाटो पाकिस्तानी दुतावासाच्या अधिकाऱ्यांच्या संपर्कात आशिल्लो. ते ताका पयशे, सीमकार्ड दिताले. तो पाकिस्तानांत भोंवूनय आयला. ताका काश्मीरांतल्या विमानतळाचो फोटोय धाडपाक सांगिल्लो. तिसरो नौमान इलाही. हो सुरक्षा रक्षक तांकां संवेदनशील म्हायती दितालो. तोय पाकिस्तान भोंवून आयला. मुहंमद मुर्तझा अली हो मोबायल अॅप तयार करता. जालंधरांतलो हुशार तरणाटो. पाकिस्तानांतल्या आयएसआय खातीर आपलें अॅप वापरून हेरगिरी करतालो. शेहजाद हो कपडे, काॅस्मेटीक विकपाक पाकिस्तानाक वतालो. तेन्ना तांकां म्हायती दितालो. आयएसआयक भारतांत हल्ले कशे करपाक मेळटले, तेय तो सांगतालो खंय. सुखप्रीत सिंगान (19) आॅपरेशन सिंदूरा कडेन संंबंदीत म्हायती पाकिस्तानाक दिल्ली अशी म्हायती आसा. ताका ते खातीर एक लाख रुपया मेळ्ळ्यात. करणबीर सिंग हो फाटले 15 दीस पाकिस्तानाक लश्करा विशीं म्हायती दितालो. तो शीम वाठारांत ड्रग्सांचें स्मगलिंगूय करतालो, अशें पुलिसांनी सांगलें. गजाला ही विधवा आनी यामीन मुहंमद हांचेर पयश्यां खातीर गुपीत म्हायती दिल्ल्याचो
आरोप आसा.
नोकरी, पयसो, धंद्याक मजत, फुकटांत पिकनीक… अश्या साबार हांयसांक हे तरणाटे बळी पडल्यात. हांच्या सगल्यांच्या संपर्कांत दानिश आशिल्लो. म्हणटकच ह्या इकराय जाणांचो हेरगिरींत हात आसतलोच. थोड्यांच्या आड ठोस पुरावे मेळूंक नात इतलेंच. पुलीस ते सोदतात.
हेरगिरी करप हो गंभीर गुन्यांव. खास करून राष्ट्रीय सुरक्षा, लश्करी म्हायती विशीं हेरगिरी केल्यार 14 वर्सां मेरेन बंदखणीची ख्यास्त मेळूं येता. जल्मभर बंदखण वा फांशीय जावं येता. तेन्ना तरणाट्यांनी कांय गजाली गंभीरपणान घेवंक जाय. सोशल मिडियाचेर वावुरपी तरणाट्यांनी तर चड सादूर रावंक जाय. परवानगी नासतना लश्कर, पुलीस स्टेशनां, बंदखणींचे फोटो, व्हिडियो काडप म्हणल्यार संकश्टाक आमंत्रण. ह्या सगल्यांनी हेरगिरी केल्या, अशें पुलीस म्हणटात. बेगीन खर पुरावे एकठांय केल्यारूच ह्या सगल्यांक ख्यास्त मेळटली. ह्या प्रकरणां वयल्यान हेर तरणाट्यांनीय बोध घेवंक जाय. हेरगिरीच न्हय, हेर कसल्याय गुन्यांवकारी, बेकायदेशीर कामां खातीर वांगडा यो, पार्टी दितां, पयशे, नोकरी दितां म्हूण कोण सांगूक शकता. हांयसांचो पावस पडटलो, तो खीणभराच्या सुखा खातीर आंगार घेवप काय चुकोवप तें दरेकल्यान थारावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
