भांगरभूंय | प्रतिनिधी
-राज्यपाल आनंद बोसः आयएएस अधिकाऱ्यांनी वाचन चालूच दवरचें
पणजी : आयएएस अधिकारी परिक्षा उत्तीर्ण जाल्ले उपरांत पुस्तकांचें वाचन करप बंद करतात. आयएएस अधिकाऱ्यां मदलो हो एक अलिखीत नेम. ह्या नेमाक हांवेन लेगीत पाळो दिला. पूण राज्यपाल पी. एस. श्रीधरन पिल्लई हांचें पुस्तक वाचून हो नेम हांवेन मोडलो. तांची पुस्तकां वाचनीय आसतात, अशें अस्तंत बंगालचे राज्यपाल सी. व्ही. आनंद बोस हांणी सांगलें. दायज, संस्कृताय आनी सैमाच्या जतनायेंतल्यान आत्मनिर्भर भारताची निर्मिती जातली, अशेंय तांणी म्हणलें.
अस्तंत बंगालचे राज्यपाल सी. व्ही. आनंद बाेस हांचें हस्तुकीं गोंयचे राज्यपाल पी. एस. श्रीधरन पिल्लई हांच्या दोन पुस्तकांचें प्रकाशन जाले. राजभवनाचेर जाल्ल्या पुस्तक प्रकाशन कार्यावळीक मुख्यमंत्री डॉ. प्रमोद सावंत, म्हायती तंत्रज्ञान खात्याचे मंत्री रोहन खंवटे आनी हेर मानेस्त हाजीर आशिल्ले.
ह्या वेळार राज्यपाल आनंद बोस हांणी राज्यपाल श्रीधरन पिल्लई हांच्या कार्याची तोखणाय केली. आनंद बोस हे 1977 च्या तुकडीचे आयएएस अधिकारी. विवीध राज्यांनी जिल्होधिकारी तशेंच भारत सरकाराच्या सचिवपदाचो तांणी कार्यभार सांबाळ्ळां.
राज्यपाल म्हूण वावर करतना आपणें गांवांक भेटी दिवंक ना. राज्यपाल पिल्लई हांणी गोंयांतल्या 400 गांवांक भेट दिल्यात. ह्या अणभवांतल्यान तांणी ‘हेरिटेज ट्रीस ऑफ गोवा’ हें पुस्तक बरयलां. वकील, साहित्यीक, राजकारणी आनी आतां राज्यपाल अशा तरेकवार भुमिकांतल्यान तांणी लोकांची सेवा केल्या. भारतीय घटणेन लोकांक सर्वोच्च स्थान दिलां. ‘वी द पिपल ऑफ इंडिया’…अशा उतरांतल्यान घटनेची सुरवात जाता. राज्यपाल पिल्लई हांचे हें पुस्तक सैमाचेर आदारीत आसा. सैम, धर्म, इतिहास , दायज आनी संस्कृताय हांचेर पिल्लई हांचो अभ्यास आसा. ह्या अभ्यासांतल्यान तांणी अदमासे दोनशे वयर पुस्तकां बरयल्यात.
केंद्र – राज्य सरकारां मदीं समन्वय सादपाचें काम राज्यपालांचें
केंद्र सरकार आनी राज्य सरकार हांचें मदीं समन्वय सादपाचें काम राज्यपालांक करचें पडटा. केंद्र सरकार जे प्रस्ताव सादर करता, ते राज्यांक मान्य जायनात. हाका लागून राज्यपालपदाची जापसालदारी वाडटा, अशें बोस हांणी सांगलें.
भगवान श्रीकृष्ण कुशळ राज्यपाल…
सत्यभामा आनी रुक्मिणी ह्यो भगवान श्रीकृष्णाच्यो दोन बायलो. सत्यभामा हिणें पारिजातकाची मागणी केली. ते प्रमाण कृष्णान पारिजातकाचें झाड सत्यभामा आनी रुक्मिणी हांच्या दोनूय महालांच्या मदले शिमेर लायले. पारिजातकाचें मूळ सत्यभामाच्या महालांत, जाल्यार फांदयो मात रुक्मिणीच्या महालाच्या प्रांगणांत सोडल्यो. श्रीकृष्ण कुशळ राज्यपाल आशिल्लो, अशें उदाहरणा सयत राज्यपाल सी. व्ही. आनंद बोस हांणी स्पश्ट केले. ‘परित्राणाय साधूनाम् विनाशाय च दुष्कृताम्। धर्मसंस्थापनार्थाय सम्भवामि युगे-युगे’… अशा संस्कृत श्लोकांचो वापर राज्यपाल बोस हांणी भाशणांत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
