भांगरभूंय | प्रतिनिधी
म्हापशें: तार पूल ते हळदोणें प्रासार मेरेनच्या मुखेल रस्त्याची चाळण जाल्या. व्हांवून गेल्ल्या ह्या रस्त्यार व्हड फोंडकुलां पडल्यांत. गाडी चलयतना वाहन चालकांक सर्कस करची पडटा.
पुला कुशीची चर्च ते म्हापशें अर्बन मेरेनचो हो रस्तो फोंडकुलांनी भरला. नव्या तार पुलाच्या बांदकामा वेळार पुलाच्या दोनूय वटानचे अर्द किलो मिटर रस्त्याचें डांबरीकरण केल्लें ना. ताका लागून आतां पडत आशिल्ल्या पावसाक लागून रस्तो व्हांवून गेला.
पालिका मंडळान रस्त्यार पडिल्लीं हीं फोंडकुलां वेळारूच पुरोवंक जाय आशिल्लीं. पूण पालिकेन हाचे कडेन आडनदर केली. कामगार, ट्रक आनी फातराच्या उणावाचें कारण दीत पालिका मंडळान ह्या फोंडकुलां कडेन आडनदर केली.
पालिका वाठारांतल्या प्रभाग 20 आनी हळदोणें मतदारसंघांतल्या लोकांचो हो म्हत्वाचो एकूच रस्तो. ह्या रस्त्या वयल्यान लोक व्हड प्रमाणांत यो-वच करतात. पूण रस्त्यार पडिल्ल्या फोंडकुलां कडेन पालिका मंडळान आडनदर केल्ल्यान येरादारी खातीर समस्या निर्माण जाल्या.
शिवोले-चोपडें पुलार फोंडकुलां
शिवोले-चोपडें पुला वयल्या रस्त्यार तशेंच जोड रस्त्यार फोंडकुलां पडल्यात. हीं फोंडकुलां ताकतिकेन पुरोवचीं अशी मागणी वाहन चालकां कडल्यान जायत आसा.
शिवोले वटेनच्या जोड रस्त्यार व्हड फोंडकुलां पडल्यांत. फुडल्या कांय दिसांत पावसाक लागून हीं फोंडकुलां आनीक व्हड जातलीं. पुला वयल्या रस्त्यार लेगीत खूबशीं ल्हान व्हड फोंडकुलां पडल्यांत. पावसाक लागून ह्या फोंडकुलांचें आनीक कांय दिसांनी व्हड फोंडकुलांनी रुपांतर जातलें. ताका लागून हीं फोंडकुलां ताकतिकेन पुरोवपाची मागणी थळाव्यां कडल्यान जायत आसा.
शिवोली मतदारसंघाची आमदार डिलायला लोबो आनी मांद्रें मतदारसंघाचे आमदार जीत आरोलकार हांणी ह्या प्रकरणांत लक्ष घालचें अशी मागणी वाहन चालक करीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
