ज्योती मल्होत्रा… गोंयांतूय !

भांगरभूंय | प्रतिनिधी

ज्यो ती मल्होत्रा ह्या यू-ट्यूबराक ताब्यांत घेतले उपरांत देशांत खवदळ पडला. एक हिंदू चली पाकिस्तानाची गुप्तहेर जाता ही गजालूच सामकी भयानक आसा. पाकिस्तानांत तिका सहज प्रवेश मेळटा, थंयच्यान कनॅक्शन जोडून ती चिनांतूय पावता, कैलास मानसरोवर वचप म्हणल्यार डोक्युमेंटांच्यो कितल्योश्योच कटकटी, थंयूय ती पावता. बांगलादेश, अरुणाचल प्रदेश, तिबेटांतूय तें पावता. सामकी लक्झरी जीण जगता, हें सगलें पाकिस्तानाच्या पयशां नेटार.
आतां हें ज्योती मल्होत्रा गोंयांतूय पाविल्लें. ताच्या यू ट्यूब अॅकावंटा वेले व्हिडियो पळयल्यार तातूंत गोंया संबंदी तीन व्हिडियो मेळटात. दुदसागर गोवा ट्रेन जर्नी, मुंबय टू गोवा मांडोवी एक्स्प्रेस आनी मांडवी एक्स्प्रेस कोंकण रूट का मजा. हे तिनूय व्हिडियो 9 म्हयन्यां पयलीचें आसात. ह्या व्हिडियोंत ताणें ट्रेनींतल्यान काडिल्लें चित्रण आसा. अर्द वर ते 50 मिणटांच्या ह्या व्हिडियोंत ताणें दुबाव येवपा सारके कांय दाखोवंक ना. एकवेळ दाखयलां आसत जाल्यार आमच्या सारकिल्ल्यांचे नदरेक येवप कठीण. ताका, खुबूच प्रशिक्षीत सैन्य, गुप्तहेर ना जाल्यार सुरक्षा अधिकारी आसचो पडटा. ताणें घालां तितलेंच चित्रण केलां आसतलें अशें ना. घालूंक नाशिल्ल्यो गजालीय आसतल्यो. ताका धरिल्ले अधिकारी सगल्या आंगांनी तपास करतात आसतलेंच. सगल्या व्हिडियोंची चाळणीय जाल्या आसतली. पूण, गोंयांतल्या पर्यटन सुवातांचे सुरक्षेचे नदरेन आतां चड जागृत रावप गरजेचें आसा. सुरक्षा यंत्रणा आपले परीन काम करता, जर कोणाकूय दुबाव आयलो जाल्यार तांणीय त्या वेळार गरजेचीं पावलां उखलपाक जाय. देखीक पुलिसांक कळोवप.
देशाक ज्योती मल्होत्रा सारक्या गुप्तहेर यू ट्युबरां कडल्यान धोको आसाच. देशा भितरूय असले यू ट्युबर आसात जे एखाद्या राज्याची बदनामी करपाक फाटीं फुडें पळयनात. फॅक्ट चेक नांवाचो प्रकारूच ना. इल्लेंशें हाताक लागलें जाल्यार तो व्हड दोंगर करून दाखोवपाक हे खुबूच हुशार. ज्योतीन पाकिस्तानांत वचून भोंवून थंय कितलें बरें वातावरण आसा, लोक कितलो बरो आसा हें दाखोवपाचो यत्न केलो. तें पंजाब प्रांताची मुख्यमंत्री शरीफ हांकांय सहज वचून मेळ्ळी. थंयचे अधिकारीय सहज मेळ्ळे. म्हणटकच पाकिस्तान एक सुरक्षीत देश म्हूण दाखोवपा खातीर पाकिस्तानान तिका पोसली, तिका जाय तितलो पयसो दिलो. आतां गोंयचें बाबतींत कांय यू ट्युबर, सोशल मिडिया इन्फ्लुएंसर अशेंच कितें तरी करतना दिसतात.
हे इन्फ्लुएंसर कोण ते सोदून काडून तांचेर योग्य कारवाय जावपाक गरजेची आसात. देशा आड पाकिस्ताना वांगडा मेळून काम करपी ज्योती देशद्रोही आसाच. तशेंच, आपल्याच देशाच्या एखाद्या राज्याची बदनामी करप्याकूय देशद्रोहीच मानपाक जाय. पयलीं राजा-महाराजांच्या काळांत राज्या आड काम करप्यां आड राजद्रोहाचो आरोप लायताले, तांचेर कारवाय जाताली. आतां राज्यां आड काम करपी त्या-त्या राज्यांचे आसतलेंच अशें ना. तेन्ना तांकां राजद्रोह कसो लावपाक मेळटलो? तेन्ना देशद्रोहाची व्याख्याच तांचे खातीर योग्य आसा.
गोंया आड सोशल मिडियाचेर बदनामी चालूच आसा. दर्यादेगांचेर अशे फटयतात, तशे फटयतात. जेवण इतलें म्हारग, रावप इतलें म्हारग. गोंया परस विदेश भोंवडी परवडटा, ती सवाय, अशे तरेचे व्हिडियो येतात. हे व्हिडियो घालपी ते इतले बेस बरे तरेन तयार करतात, ताका म्युजीक घालून ते भडक करतात की सामान्य लोक, पर्यटक ते खरे मानपाक लागतात, ताचो परिणाम पर्यटनाचेर जावपाक शकता.
गोंयची बदनामी करपाक ह्या सोशल मिडिया इंफ्लुएंसरांक कोण तरी पोसता, हें मात खरें. गोंय सरकार तांचे पद्दतीन ताचो सोद घेता. कितलें येंस मेळ्ळां, हें तपास करप्यांकूच खबर. मात, लोकांनी असल्या व्हिडियोंचेर विस्वास दवरूं नाकात म्हूण गोंया भायर वता तेन्ना वा आपल्या सोशल मिडिया प्लॅटफॉर्मार, तशेंच गोंया भायल्या इश्टां मदीं, सोशल मिडिया ग्रुपार जागृती करपाक जाय.
गोंयांत दर्यादेगांचेर कांय लोक लुट्टात. मात ते गोंयकार न्हय. जो लोक नाका जाल्ल्या गजालींचो विचार तकलेंत दवरून गोंयांत येतात, तोच लोक असल्या प्रकाराक बळी पडटात. नाजाल्यार गोंया सारकें सुरक्षीत पर्यटन खंयच ना.
गोंयची सकारात्मक ‘इमेज’ सगल्याक पावोवपाची जबाबदारी जण एका गोंयकाराची आसा. ज्योती सारक्या देशद्रोही सोशल मिडिया इंफ्लुएंसरांक तांच्या ब्लॉगार, ग्रुपार, चॅनेलार जाप दिवची. कोणूय गोंयांत येतलो आनी व्हिडियो काडून गोंयची बदनामी करतलो अशें जावपाक जायना. ज्योती मल्होत्राच्या प्रकरणा वेल्यान सोशल मिडिया इंफ्लुएंसरान आपूण कितें करता, योग्य करता काय ना? हाचो विचार करून पळोवपाक जाय. कोणूय पयशे दिवन एखाद्याची बदनामी करपाक लायता आसत जाल्यार सादूर रावपाक जाय, हे प्रकरण केन्ना तरी भुजतलें, हाची जाणविकास दवरपाक जाय.
आतां गोंय सरकार, पर्यटन खातें पर्यटन मळार बऱ्यो सुविधा दितात, बऱ्यो येवजण्यो हाडटात. तेन्ना सोशल मिडिया इंफ्लुएंसर म्हूण काम करप्यांनी स्वता जावन गोंय संवसारा मुखार बरे तरेन हाडपा खातीर फुडाकार घेवपाक जाय. जाल्यारूच वायट वृत्तीच्या लोकांच्या व्हिडियों विशीं पळोवपी दुबाव घेवपाक लागतलो.

अमर पाटील
7507495151