भांगरभूंय | प्रतिनिधी
-प्रवेशदारार सादलो विद्यार्थ्यां कडेन संवाद
फोंडेंः राष्ट्रपती द्रौपदी मुर्मू नियोजना प्रमाण बिरेस्तारा सकाळीं कवळें-फोंडेंच्या श्री शांतादुर्गा देवस्थानाक भेट दिवपाक वताल्यो. अचकींत तांणी जीव्हीएम कॉलेजी भायर विद्यार्थ्यांची गर्दी पळयली. विद्यार्थ्यांक मेळपाची राष्ट्रपतींक इत्सा जाली. तांणी रोखडीच अधिकाऱ्यांक मोटार थांबोवपाक सांगलें. ते उपरांत राष्ट्रपती गाडयेंतल्यान सकयल देंवल्यो. कॉलेजच्या प्रवेशदाराचेरूच तांणी 5 मिणटां विद्यार्थ्यां कडेन संवाद सादलो आनी त्यो फुडल्या प्रवासा खातीर गेल्यो.
राष्ट्रपतींच्या भोंवडेचें नियोजन पयलींच थारिल्लें आसता. त्या नियोजनाक खरपणान पाळो दितात. सध्या गोंय विद्यापिठाच्या दिक्षांत सुवाळ्याच्या निमतान राष्ट्रपती द्रौपदी मुर्मू गोंय भोंवडेर आसात. तांच्यो कार्यावळी नियोजना प्रमाणूच आसतात. नियोजना प्रमाण बिरेस्तारा सकाळीं राष्ट्रपती कवळ्यां श्री शांतादुर्गा मंदिराक भेट दिवपाच्यो आशिल्ल्यो. तांचो ताफो कवळेंचे दिशेन वतालो. ह्या वाठारांतल्या जीव्हीएम कॉलेजी भायर विद्यार्थ्यांची गर्दी तांणी पळयली, आनी तांकां मेळपाची तांकां इत्सा जाली. तांणी रोखडीच अधिकाऱ्यांक गाडी थांबोवपाक सांगलें. तांचे सुचोवणे प्रमाण पुराय ताफो थंय रावलो. हातूंत राज्यपाल पी. एस. श्रीधरन पिल्लई आनी मुख्यमंत्री डॉ. प्रमोद सावंत आशिल्ले. राष्ट्रपती, राज्यपाल आनी मुख्यमंत्री मुखार पळोवन विद्यार्थ्यांकूय धपको बसलो. पांच मिणटां राष्ट्रपतींनी विद्यार्थ्यां कडेन संवाद सादलो. तांकां उर्बा दिली, चॉकलेट्स वांटल्यो. उपरांत त्यो फुडल्या प्रवासाक गेल्यो. तांणी दिल्लीं अचकींत भेट विद्यार्थ्यां खातीर अविस्मरणीय थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
