भांगरभूंय | प्रतिनिधी
भांगरभूंय । प्रतिनिधी
मडगांवः उसगांव- फोंडें हागच्या कत्तलखान्यात मुसलमान लोक 28 जून तें 1 जुलय मजगतीं कुर्बानी दितले. ह्या वेळार अनुचीत प्रकार जावचे न्हय हे खातीर दक्षीण गोंय जिल्होधिकारी आनी दंडाधिकारी आश्वीन चंद्र ए हांणी ह्या वाठारांत जमाव बंदीचें 144 वे कलम लागू केलां. कत्तलखान्याच्या एक किलोमीटर वाठरांत चार वा ताचे परस चड लोकांच्या जमावाक वचपाक मेळचें ना.
फाटल्या 23 जूनाक मुख्यमंत्री डॉ प्रमोद सावंत हांणी जिल्होधिकाऱ्या वांगडा घेतिल्ले बसकेंत कत्तलखानो वाठारांत कुर्बानी वेळार कायदो आनी सुवेवस्थेचो प्रश्न उप्रासचो न्हय हे खातीर हे खातीर उपाय येवजण करपाची सूचोवणी केल्ली. अखील गोंय मुस्लिम जमात असोसिएशन 28 जून सावन मोलें चेकपोस्ट आनी काणकोणांतल्या पोळे चेकपोस्टा कडल्यान कुर्बानी खातीर गोरवांक हाडपाचे आसात. गोरवां सांबाळ खात्याचे अधिकारी दोनूय कडेन थांबून गोरवाचे येदारीचेर नदर दवोरतले.
कत्तलखान्या कडेन जमाव येवपाच्या घडणुको हाचे पयलीं जाल्यात ताचो विचार करून शांतताय आनी सुवेवस्था राखपा खातीर जमाव बंदी लागू केल्या. 2 जुलय मेरेन ती लागू आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
