भांगरभूंय | प्रतिनिधी
पणजी: फाल्यां 10वेर गोंयांतल्या 186 पंचायती खातीर मतदान जातलें. हातूंत उत्तर गोंयांत 27 जाल्यार दक्षीण गोंयांत 18 मेळून 45 हुस्काचे, असुरक्षीत वा संवेदनशील मतदान केंद्र आशिल्ल्याची म्हायती मुखार आयल्या.
उत्तर गोंयांतल्या बार्देस म्हालांतलीं 15 आनी तिसवाडी म्हालांतलीं 12 मतदान केंद्रां असुरक्षीत वा संवेदनशील आसात. तातूंत बार्देस म्हालांतल्या कांदोळी पंचायतीचे प्रभाग तीन, पेन्स द फ्रान्का पंचायतीचे प्रभाग 5 आनी 6ए मेळून तीन मतदान केंद्रां असुरक्षीत आसात.
तिसवाडी म्हालांतल्या चिंबल पंचायतीचे प्रभाग एक मदलो 1 आनी 1ए मतदान केंद्र, प्रभाग तिनांतलो 3 आनी 3ए मतदान केंद्र, सांता क्रुझ पंचायतीचे प्रभाग 2, 3, 6 आनी 8ए मतदान केंद्र, करमळी पंचायतीचे प्रभाग 2 मतदान केंद्र, खोर्ली पंचायतीचे प्रभाग 8 आनी 9 मतदान केंद्र मेळून 12 मतदान केंद्र हुस्क्याचे आसात.
हाचे बगर बार्देस म्हालांतल्या साळगांव पंचायतीचे प्रभाग 2, 3, 4, 5 आनी 6 मतदान केंद्र, सांगाल्डें पंचायतीचे प्रभाग 4, 5, 6 आनी 7 मतदान केंद्र, जाल्यार रेईश मागूश पंचायतीचे प्रभाग 9, 10 आनी 11 मेळून 12 संवेदनशील मतदान केंद्र आसात.
दक्षीण गांयांतल्या साश्ट म्हालांतले रुमडामळ-दवर्ली पंचायतींतले चार मतदान केंद्र हुस्क्याचे आसात. मुरगांव म्हालांतल्या चिखली आनी सांकवाळ पंचायतींतले दरेकी स मतदान केंद्र मेळून 12 मतदान केंद्र असुरक्षीत आसात. जाल्यार केपें म्हालांतल्या आंबावली पंचायतींतले दोन मतदान केंद्र संवेदनशील आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
