भांगरभूंय | प्रतिनिधी
खबरां संस्था
मुंबयः कुवेतांत सुरू आशिल्ल्या आशियाई युवा अॅथलेटिक्स सर्तींत महाराष्ट्राच्या दोन चलयांनी भारताक दोन पदकां मेळोवन दिली. 400 मीटर धांवपाचे सर्तींत ईशा जाधवान रुप्या पदक जाल्यार अनुष्का कुंभार हिणे कांस्या पदक जिखले. राष्ट्रीय युवा सर्तींत भांगरा पदक मेळोवपी 16 वर्सा पिरायेच्या इनान 56.16 सेकंद ही वेळ नोंद करून रुप्या पदक आपल्या नांवार केलें. तागेली ही पयलीच आंतरराष्ट्रीय सर्त आशिल्ली.
अनुष्कान 57.36 सेकंद वेळान कांस्या पदक मेळयलें. फाटल्या जुलय म्हयन्यांत कोलंबिया हांगा जाल्ले संवसारीक कुमारी सर्तींत ताणे वांटो घेतिल्लो. अॅथलेटिक्स सर्तीच्या पयल्या दिसा आकाश यादवान 19.37 मीटर गुळो मोखून मारून भारताक पयलें भांगरा पदक मेळोवन दिल्लें. चल्यांच्या 1500 मीटर सर्तींत अमीत चौधरीन 4 मिनटां 4.49 सेंकद वेळ नोंद करून दुसरे भांगरा पदक जिखून दिल्लें.
चलयांचे थाळी फेकीत निकिता कुमारीक कांस्या पदकाचेर खोस मानची पडिल्ली. मुबस्सिना मोहमान लांब उडयेंत 5.91 मीटर अंतराची उडी मारून पयलें आंतरराष्ट्रीय पदक जिखपाची किमया केल्ली. पोल व्हॉल्टांत कुलदीप कुमारान 4.80 मीटर उडी मारून कांस्या पदक जिखल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
