भांगरभूंय | प्रतिनिधी
मतदारसंघांचे फेररचणुके उपरांत घेतले निर्णय
पणजी : गोंय विधानसभेंत आदिवासींक मतदारसंघ राखीव दवरपाक केंद्र सरकारान सध्या तरी न्हयकार दिला. 2026 चे जनगणने उपरांत मतदारसंघाची फेररचणूक जातली. ते उपरांतूच अनुसूचीत जाती (एससी) आनी अनुसूचीत जमातीं (एसटी) खातीर कितले मतदारसंघ राखीव दवरचे, ते थारतले, अशें केंद्रान गोंय सरकाराक कळयला.
राज्य विधानसभा वेंचणुकेंत एसटी समाजा खातीर मतदारसंघ राखीव दवरचे, अशी मागणी ‘मिशन पॉलिटिकल रिझर्व्हेशन फॉर एसटी ऑफ गोवा’ हे संघटणेन फाटल्या कांय म्हयन्यां पसून केल्ली. मागणी पुराय करून घेवपाक संघटणेचे फुडारी विवीध मार्गांनी यत्न करतात. हे विशीं तांणी संसद अधिवेशना पयलीं आदिवासी कल्याण संसदीय समितीचे अध्यक्ष डॉ. किरीट सोळंकी हांचीय भेट घेतिल्ली. पूण आतां केंद्र सरकारान सध्या तरी मतदारसंघ राखीव दवरपाक न्हयकार दिला. 2026 चे जनगणने उपरांतूच मतदारसंघ राखीव दवरपा विशीं निर्णय घेतले, अशें तांणी स्पश्ट केले.
गोंयांत वट्ट लोकसंख्येच्या 10.23 टक्के एसटींची लोकसंख्या
-2011 चे जनगणने प्रमाण गोंयांतल्या एसटींची संख्या वट्ट लोकसंख्येच्या 10.23 टक्के इतली आसा. ताका लागून एसटी लोकसंख्या चड आशिल्ले चार मतदारसंघ राखीव दवरचे, अशी मागणी ‘मिशन पॉलिटिकल रिझर्व्हेशन फॉर एसटी ऑफ गोवा’ च्या बॅनरा खाला आयिल्ल्या 14 संघटणांनी केल्ली.
– आरक्षणाचाे विशय केंद्र सरकारच्या अखत्यारीत येता. ताका लागून लोकसभा वेंचणुके पयलीं संसदेंत हे विशींचें विधेयक मंजूर केले ना जाल्यार लोकसभा वेंचणुकेचेर बहिश्कार घालपाची शिटकावणी आदिवासी संघटणानी दिल्ली.
– आदिवासी संघटणां आक्रमक जाले उपरांत सरकार पांवड्याचेरूय हे खातीर यत्न सुरू केल्ले. ते प्रमाण एसटीं खातीर विधानसभेंत राखिवता मेळची हे खातीर फेररचणूक आयोग स्थापन करपाक मान्यताय दिवपाचो प्रस्ताव आदिवासी कल्याण खात्यान केंद्रीय कायदो आनी न्याय मंत्रालयाक कांय म्हयन्यां पयलीं धाडिल्लो.
आस्वासना प्रमाण मुख्यमंत्र्यांनी सर्वपक्षीय शिश्टमंडळ दिल्लींत व्हरचें
मतदारसंघ फेररचणुकेचो फॉर्म्युला वापरून केंद्र सरकारान गोंयांतल्या आदिवासींक 2026 पयलीं राखिवता दिवपाचो प्रस्ताव भायरायला. पूण हो फॉर्म्यूला गोंयांतल्या आदिवासींक लागू जायना. कारण गोंयांतल्या आदिवासींक विधानसभा वा लोकसभा वेंचणुकेंतूय राखिवता दिवंक नाशिल्ली. केंद्र सरकारान आपल्या निर्णयाचो फेरविचार करून गोंयांत आदिवासींक राखिवता दिवची. तशेंच मुख्यमंत्री डॉ. प्रमोद सावंत हांणी विधानसभा अधिवेशनांत दिल्लें सर्वपक्षीय शिश्टमंडळ दिल्लींत व्हरपाचें आस्वासन पुराय करचें. लोकसभा वेंचणुके पयलीं राखिवता मेळ्ळी ना जाल्यार आमी निश्चीत लोकसभा वेंचणुकेचेर बहिश्कार घालतले. राखिवते खातीर गांवागांवांनी वचून जागृताय करपाचो आमी निर्णय घेतला, अशें ‘मिशन पॉलिटिकल रिझर्व्हेशन फॉर एसटी ऑफ गोवा’ चे अध्यक्ष जॉन फर्नांडीस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
